Seoul. Könyaq Koreäneñ yaña prezidentı Roh Moo-hyun üz wazifaların ütäwgä kereşü tantanasında, kommunistik Tönyaqnıñ raketa sınawın xökem itep, anı “bar dönya tınıçlığına yanağan citdi qurqınıç” dip atadı. “Tönyaq Koreäneñ üz atom qoralın eşläp çığaruwı turındağı şiklär dönya tınıçlığına citdi qurqınıç bulıp tora, Koreä yarımutrawı häm tönyaq-könçığış Aziä turında inde äytep tä torası yuq. Tönyaq Koreäneñ atom täräqqiatenä yul quyarğa yaramıy, Pxenyan moñardan waz kiçärgä tieş” dip belderä Könyaq Koreä prezidentı. Anıñ süzlärenä qarağanda, Tönyaq Koreä ike närsäneñ bersen, üzendä atom qoralları buldırunı yä iminlek garantiäläre alıp xalıqara yaqlaw qazanunı saylarğa tieş. Üz çığışında Roh iğtibarnı şulay uq, Könyaq Koreäneñ bu mäs’älädä Quşma Ştatlar belän qarşılıqlarına da yünältte. Yaña prezident Tönyaqqa qarşı xärbi köç qullanunı kire qağa, amerikannar isä bu uñaydan bar mömkinleklär dä qarala dip belderä. Sişämbegä qarşı töndä Tönyaq Koreä, Könyaqta yaña prezidentnıñ üz wazifalarına kereşü tantanasına turı kiterep Yapon diñgezendä raketa sınawları ütkärde.
