Änkara. Törkiäneñ xakimiattäge Ğädellek wä Täräqqiat partiäse wäkilläre ilgä amerikan ğäskärlären kertügä röxsät birü mäs’äläsen tikşerü öçen bügen yabıq işeklär artında maxsus oçraşu ütkärde. Älegä urtaq qararğa kilä almaw säbäple fiker alışular irtägägä qädär kiçekterelde. Partiäneñ törek parlamentındağı küp kenä deputatları Änkaranıñ Ğiraqqa qarşı suğışta qatnaşuwına kisken qarşı çığa. Ğiraqqa qarşı suğış başlanğan oçraqta Törkiädä 62 meñ amerikan ğäskärien urnaştıruğa röxsätne parlament birergä tieş, xökümät inde andıy üteneç belän aña möräcäğät itte. Törkiäneñ tışqı eşlär ministrı Yäşär Yakış, parlamentnıñ älege mäs’äläne tawışqa quyuwı, Änkara belän Waşington arasında suğış çığımnarın qaplaw ölkäsendä barğan söyläşülärneñ näticäsenä bäyle bulaçaq dip belderde. Röxsät alunıñ aşığıç buluwına basım yasap bügen törek premyer-ministrı Abdulla Göl belän telefon aşa Quşma Ştatlarnıñ däwlät sekretare Colin Powell da söyläşep aldı. Ul arada Törkiä üzeneñ Bagdadtağı ilçelegendä bulğan bar xezmätkärlären dä Ğiraqtan kire üz ilenä qaytardı.
