Accessibility links

Кайнар хәбәр

Yaña hicri yıl belän!


4 martta, yäğni möxärräm ayınıñ berençe könendä, yaña 1424 hicri yıl başlanıp kitte. Bu waqiğa, moña qädär zurlap ütkärelmäsä dä, bıyıl möselman bäyrämnäre belän ber rättän iğtibar üzägendä buldı. Rusiäneñ iñ ere gäzitlärneñ bersendä, Rusiä möftilär şurası räise Rawil Ğäynetdinneñ möräcäğäte basıldı. Anda ul Rusiä möselmannarın bu bäyräm belän qotlıy häm küpmeder däräcädä säyäsi belderü da yasıy. Bez, möselmannar, başqa din totuçılar belän, ayırım alğanda pravolslav dinen totuçılar belän tınıç yäşäw täcribäse belän çın mäğnäsendä ğorurlana alabız, - dip äytä anda Rawil xäzrät Ğäynetdin.

Kemerovo ölkäse gubernatorı Aman Tuleyev ta, bu çaradan çittä qalmadı, Tatarstan möftie Ğosman xäzrät İsxaqiğa qotlaw telegrammasın cibärde. Aman Tuleyev ğadi möselman keşese tügel, ul äle xaci da ikän. Şuña da, möselman bäyrämnären Aman xaci onıtmıy, yaña yılğa da, zur möselman bäyrämnärenä dä yıl sayın qotlawların cibärep tora, dip xäbär itä İntertat.ru elektron gäzite. Qazan mäçetlärendä yaña hicri yıl başlanu uñayınnan ayırım bäyräm çaraları ütkärelmäde. Ämma Allahka möräcäğät itep, yaqınnarnı qotlarğa bula, dide bu kön xaqında Märcäni mäçeteneñ imam-xatibı Fatix xäzrät Xucin:

Audio: Hicri yıl isäbe Möxämmät päyğämbärneñ Allah Rabbıbız ämere belän Mäkkädän Mädinägä hicrät itüennän, yäğni küçep kitüennän başlana. Bıyıl inde bez 1424 hicri yılğa ireştek. Päyğämbärbez äytkän di, dinebezdä ike zur bäyräm bar – Qorban häm Uraza ğäyetläre, şuña kürä yaña yılnıñ başlanuı zurlap ütkärelmi.
XS
SM
MD
LG