Accessibility links

Кайнар хәбәр

Prezident Tatarstan xatın-qızların qotladı


Çärşämbe, 5 mart könne, Qazannıñ mäşhür Piramida üzägendä Tatarstan prezidentı Mintimer Şäymiev respublikanıñ iñ uñğan, iñ bilgele xatın-qızların 8 mart – xalıqara xatın-qızlar bäyräme belän qotlarğa çaqırdı. Ğädättä bu kiçädä rus häm tatar sänğäteneñ iñ kürkäm ostaları çığış yasap, xatın-qızlarğa ruxi büläk yasıy. Ber yıl eçendä xatın-qızlar tormışında bulğan iñ zur waqiğalar iskä alına. Bıyılğı oçraşunıñ üzençälege – prezidentnıñ xatın-qızlarnı yaña tözelgän Piramida binasında qabul itüe. Mondıy zatlı häm danı çıqqan Piramidağa şiklänä-şiklänä kerep baruçı awıl apaları da, ğorur atlawçı çinovnik xanımnar häm eşmäkärlär, ğalimälär öçen genä tügel, ä Tatarstandağı barlıq keşe öçen dä ğäcäyep märtäbäle oçraşu buldı bu. Xatın-qızlar yazmışı, analar, balalar turında cılı süzlär, moñlı cırlar xäzergä salqın bulıp toyılğan Piramidağa can örde. 500-läp qunaqnıñ härqaysı sıy-xörmätlär quyılğan östäl artında utırıp, säxnädäge tamaşanı qaradı. Äytergä kiräk, bu yulı konsertta atqazanğan artist yäki cır festivale laureatı isemen yörtüçelär qatnaşmadı diärlek. Ğädättä räsmi çığışlarda kürenmi torğan häm yaña ğına üz talantların kürsätep keşelärne ğäcäpkä qaldırğan yäş talantlar bersennän-berse uzdırıp çığış yasadı:

Audio

Soñğı yıllarda ğädätkä kerä başlağan bu yolanı “Tatarstan xatın-qızları” respublika cämäğät oyışması ütkärä. Citäkçe urınnarda eşlägän, fändä, mädäniättä, eşquarlıqta zur uñışlarğa ireşkän xanımnardan torğan komissiä yılına ber märtäbä iñ-iñ layıqlı zatlarnıñ konkursına yomğaq yasıy. Alarnıñ täqdime buyınça prezident älege ciñüçelärgä istälekle büläklär, maxsus tamğalar häm çäçäklär tapşıra. Kemnär soñ alar bıyılğı konkursta ciñüçelär? Eşmäkär xatın-qız iseme Tübän Kamadağı säwdä kompleksı direktorı Tamar Bahawetdinovağa birelde. Lider xatın-qız, cämäğät eşleklese iseme Qazannıñ aviatözeleş rayonı militsiäse citäkçeseneñ urınbasarı, polkovnik Valentina Plexanovağa tapşırıldı. Xatın-qız – mädäniät häm ruxiät nominatsiäsendä Aqsubay rayonında Xäsän Tufan muzeyın açuğa zur öleşe kertkän häm şağirneñ muzeyın xäzer dä citäkläwçe Ruşaniä Minxanova ciñü yawladı. Xatın-qız – ana nominatsiäsendä Norlat rayonında yäşäwçe 7 bala anası Miñnecihan İsxaqova prezident qulınnan büläk alu xoquqına iä buldı. Qazannıñ meditsina kölliäte Zöhrä Xisametdinova ber yıl eçendä meditsina fännäre doktorı dissertatsiäsen yaqlağan, Rusiä Federatsiäseneñ barlıq urta belem birü uqu yortlarınıñ iñ yaxşı direktorı isemen alğan. Zöhrä Xisametdinova östäwenä iqtisat institutın tämamlağan häm xäzer Qazan universitetnıñ xoquq fakul'tetınıñ da 5 kursında uqıy ikän. Ul «Xatın-qız -- yıl ürnäge» nominatsiäsendä ciñde. «İr keşe -- namuslı yöräk» iseme Balalar respublika xastaxanäseneñ yaña tuğan balalarda yöräk-qan tamırları awıruların däwalaw bülege mödire Leonid Mirolyubovqa tapşırıldı. Ä «Üz eşeneñ ostası» nominatsiäsendä Saba rayonnınnan traktorçı Zarif Şäripov ciñep çıqtı. Piramidadağı oçraşudan turıdan-turı translyatsiä wäğdä itelgän bulsa da, ul bulmadı. Läkin kiçä televidenie tasmasına yazıp alındı häm tiz arada “Yaña ğasır”, “Tatarstan” telekanallarında kürsäteläçäk.
XS
SM
MD
LG