Azatlıq qunağı Zöhrä Kinzebaeva: Tuymazı tatarları ni xäldä?

Azatlıq radiosınıñ Qazan byurosına yış qına bersennän-berse qızıqlı qunaqlar kilä. Menä pänceşämbe könne dä bezgä Başqortstannan Zöhrä xanım Kinzebaeva kilep kitte. Mömkinlek belän faydalanıp bez Zöhrä xanımnan Tuymazıda häm, ğomumän, Başqortstanda tatarlarnı xäle, alarnı tormışı belän qızıqsındıq. Şulay uq bezgä üzeneñ Qazanğa kilüeneñ maqsatları turında da söyläde:

Başqortstanda tatar bulu ciñel tügel inde. Bu tel problemasına da, finans mäsälälärgä dä qağıla. Tizdän bezdä saylawlar bulaçaq. Anda tatar ictimaği oyışmalarınnan da ike keşe terkälde. Bezneñ oyışma alarğa da bulışırğa tırışa. Şulay uq bez uqıtuçılar belän dä eşlibez. Küptän tügel genä min Tuymazı, Bäläbäy, Oktäberskida buldım. Andağı tatar tele uqıtuçıları bergä cıyılıp, tatar telen uqıtu, tatar xälläre turında söyläşergä kiräk, digän täqdim belän çıqtılar. Şuşı arada ğına min Tuymazıda «Miras» milli-mädäni üzägeneñ filialın tözedem. Salawatta bik matur itep Därdmänd kiçäsen ütkärep qayttıq. Tuymazı yäşläreneñ Qazanğa, Tatarstanğa kilep, mondağı tormışnı kürep, Tatarstandağı millättäşläre belän oçraşası, alar belän aralaşası kilä. Alar inde törle urtaq çaralar turında da uylıylar. Läkin alarnı monda alıp kilü öçen bezneñ finans yağıbız nıq tügel. Min äle menä şul problemalarnı xäl itep yörim.