İstanbul. Bügen Törkiäneñ könyaq-könçığışındağı Siirt wilayätendä östämä saylawlar ütkärelde, häm anda ildä xakimiattä utırğan Ğädellek wä Täräqqiat partiäse başlığı Räcäp Tayup Erdoğan ciñär dip kötelä. Törkiädä äle uzğan noyäbrdä genä ütkärelgän ğomumi saylawlarda tawışlarnıñ küpçelegen Erdoğan citäklägän häm islamçı sanalğan şul partiä qazansa da, ul üze parlament äğzası bulu xoquqınnan mäxrüm itelgän ide. Xäzer şul tıyu köçtän çığarıldı häm aña deputat bulu öçen yul açıldı. Bügenge tawış birüdä ciñep çıqqannan soñ Erdoğan aldağı berniçä kön eçendä xäzerge premyer-ministr Abdulla Gulne almaştırıp Törkiäneñ yaña xökümäten qorır dip kötelä. Premyer itep bilgeläner öçen aña ilneñ parlamentında äğza bulu kiräk. Tawış birü inde tögällänsä dä anıñ näticälären qayçan iğlan itü waqıtı älegä mäğlüm tügel. Erdoğannıñ üz partiäse, tawışlarnıñ yaqınça 20 protsentı sanalıp anda 85 protsent yaqlaw qazanu xaqında belderde.
