Şulay da, xatın-qızlar häm sänğätkä bäyle ber waqiğanı kim cämäğätçelek belmi qaldı. Bäyräm aldınnan ataqlı balerina häm pedagog Ninel Yultıeva Mäskäwdä Rusiä balet sänğäteneñ iñ zur bülägenä layıq buldı. Mäskäwdä Stanislavskiy isemendäge teatr säxnäsendä aña “Metr tansa” digän nominatsiädä däräcäle priz tapşırğan waqıtta Ninel Yultıevanıñ şäkertläre bik uñışlı çığış yasağannar. Ä 7 martta Ninel xanım eşlägän xoreografiä uçileşçasında tantanalı kiçä buldı. Bu uçileşçanıñ açıluına 10 yıl tuluğa bağışlanğan sänğät kiçäsendä Tatarstannıñ mädäniät ministrı urınbasarı Ayrat Cabbarov uqıtuçılarğa maqtaw gramotaları tapşırdı. Ninel Yultıevanıñ xezmäten häm äle genä tapşırılğan bülägen kürsätü dä şunda buldı. Bäyräm aldı ığı-zığısına küräme, ällä başqa säbäptänme möstäqillek yıllarında açılğan xoreografiä uçileşçasınıñ 10 yıllığına da, Ninel Yultıevanıñ Mäskäwdän alıp qaytqan bülägenä dä matbuğatta, radio, televideniedä iğtibar kürsätelmäde. Anıñ qarawı, bez bu qızıqlı mizgel turında Azatlıq radiosı aşa söyläp, radionıñ İnternet säxifäsendä “Metr tansa” bülägen kütärgän Ninel xanımnıñ räsemen kürsätergä buldıq. Üzenä kürä xatın-qızlarğa ixtiram häm Azatlıqnıñ buldıqlı häm näfis zatlarğa bäyräm küçtänäçe bulsın, dip uyladıq. Buldıra alğan keşe, İnternet çeltärenä çığıp, www.azatliq.org säxifäsen açıp qarasın. Ninel Yultıevanıñ ätise – Dawıt Yultıy, başqort dramaturgiäseneñ klassıgı häm kürenekle prozaik, 20-30 yıllarda Başqortstannıñ zur däwlät eşleklese bulğan häm 37 yıllarda Stalin repressiä maşinası qulında häläk itelgän. Xäzergä Ufada da, başqa urında da Dawıt Yultıyğa häykäl yäki muzey açılmağan, ämma ul zur iğtibarğa layıq. Ä Ninel Yultıeva isä balet säxnälärendä çığış yasap, böten dönyanı urap çıqqannan soñ, Qazanda yäşi häm haman sänğät yoldızlığında yaqtı yana.