Amerika Quşma Ştatları häm İsrael Fälestinnärneñ “wäkälätle” premyer-ministrı belän söyläşülär başlarğa äzer

Amerika Quşma Ştatları prezidentı George Bush Aq Yortta yasağan belderüdä Fälestin Xakimiäte çınnan da wäkälätlärgä iä bulğan premyer-ministr saylağannan soñ Quşma Ştatlar tınıçlıqqa yullar täqdim itäçäk, dide. Bush süzlärenä qarağanda, tınıçlıq urnaşunı inde ozaq kötäse bulmayaçaq. Bush çığışınnan soñ Britaniä premyer-ministrı Tony Blair , älege plan Fälestin däwläteneñ tözelüenä yul açaçaq, dide. Uzğan şimbä könne Fälestinnär yulbaşçısı Yasser Arafat tarafınnan premyer-ministr itep bilgelängän Mahmoud Abbas inde kiläse atnada uq wazifalarına kereşä alaçaq, dide Blair. Fälestin Xezmät Ministrı Ğasan al-Khatib, Bushnıñ belderüendä detalle mäğlümat yuq ide, dide. “Bush çığışında uñay yaqlar bar ide, äytik-Amerika Quşma Ştatlarnıñ fälestinnärgä yardäm itü kiräklege, İsraelneñ fälestin cirlären basıp aluın tuqtatu, tınıçlıqqa yul tabuğa Quşma Ştatlarnıñ da quşıluı. Läkin yañadan, bu çığışta-şuşı täqdimnärne niçek tormışqa aşıru turında mäğlümat yuq. Prezident Bush, tınıçlıqnıñ qayçan häm niçek bulaçağın yä xalıqara cämäğätçelegeneñ bu eşkä qayçan qatnaşa başlawın äytmäde”, dide Fälestin Xezmät Ministrı.

İsrael tışqı eşlär ministrlığınıñ matbuğat wäkile Yoni Peled, İsraelneñ Fälestinnärneñ terrorğa qarşı bulğan “tulı wäkälätle” premyer-ministrı belän söyläşülär alıp barırığa äzer buluın belderde.