Accessibility links

Кайнар хәбәр

Yäkşämbegä qarşı töndä häm yäkşämbe irtäsendä Ğiraqqa qarşı koalitsiä höcüme däwam itte.


Ğiraqqa qarşı koalitsiä köçläre başqala Bağdadnı häm başqa qayber şähärlärne bombaladı. Bağdadnıñ üzägendä häm çitlärendä köçle şartlawlar buldı. Şähärneñ zur öleşendä elektr utı sünde. Şimbä kiçendä Waşingtonda AQŞ generalı Stanley McChrystal jurnalistlarğa bolay dip belderde:

AUDİO: Kiçä xärbi oçqıçlar ber meñnän artıq oçış yasap Ğiraqtağı berniçä yöz hädäfne utqa tottı. AQŞ häm Britaniä xärbi korablarınnan häm su astı köymälärennän 400-läp tomahawk raketası atıldı. Annan tış, hawadan yözläp qanatlı raketa atıldı. Häm Ğiraqnıñ törle urınnarındağı hädäflärgä hawadan tögäl idarä itelä torğan berniçä yöz şartlatqıç taşlandı.

McChrystal äytüençä, cir östendä AQŞ köçläre könyaqtan Ğiraqnıñ üzägenä taba barlığı 240-lap çaqrım yul ütkän. Koalitsiä köçläre Yefrat yılğasın ütep Än–Nasiriä şähärennän tönyaqqa taba xäräkät itä. Şulay da, Bağdad yanında koalitsiä köçlären Ğiraqnıñ iñ yaxşı ğäskärläre sanalğan Respublika Saqçılarınıñ 6 diviziäse belän bäreleş kötärgä mömkin.

Ğiraq räsmiläre äytüençä, Yefrat yılğasınıñ başındaraq, Bağdadtan 160 çaqrım könyaqta urnaşqan Nacaf şähäre yanında Ğiraq ğäskärläre AQŞ köçläreneñ tönyaqqa xäräkäten tuqtatqan. Royter xäbärçese Luke Baker Nacaftan 70 çaqrım könyaq könçığışta çiñelçä bäreleşlär kürüe turında belderä. Şulay da, AQŞ xärbiläre aña Nacafqa yaqınraq urınnarda qatıraq bäreleşlär baruı turında äytkän.

AQŞ xärbiläre äytüençä, könyaq-könçığışta Ğiraqnıñ zurlığı yağınnan ikençe şähäre bulğan Basra yanında Ğiraq ğäskärläre ciñelgän. Ämma koalitsiä köçläre şähärne çolğap ala häm anıñ yawsız ğına birelüen oyıştırırğa tırışa. Äl-Cäzirä televidenise Basradağı tınıç xalıq arasında hawa höcümnärennän 50-läp keşeneñ hälak buluı turında xäbär itte. Ämma bu mäğlümät älegä başqa bäysez çığanaqlardan raslanmadı.

AQŞ häm Britan köçläre şulay uq, Farsı qultığındağı Um-Qasr portınıñ tulısınça kontrol’gä alınuı 450-läp ğiraq soldatınıñ äsir töşüe turında belderä.

Uzğan töndä Amerikanıñ Küwäyttäge 101-nçe hawa desantına höcüm näticäsendä 13 amerikan soldatı yaralandı. Soñraq alarnıñ berse ülde dip xäbär itelde. AQŞ üzäk idaräse äytüençä, ber yäki berniçä bilgesez keşe biredä xärbi bazağa granata häm utlı qoral belän höcüm itkän. Xärbilär äytüençä, bu uñaydan ber amerikan soldatı totqarlanğan. Desantçılarğa ul höcüm itkän dip şiklänelä.

Ğiraq tışqı eşlär ministrı Naji Sabri uzğan töndä Damaskka kilgäç jurnalistlar belän oçraştı. Ul AQŞ citäkçelegendä Ğiraqqa qarşı alıp barılğan suğış Ğiraqqa qarşı ğına tügel, barlıq ğäräp illärenä qarşı da alıp barıla dide. Bügen ul Qahirädä Ğäräp illäre tışqı eşlär ministrları oçraşuında qatnaşa. Sabri koalitsiä köçläreneñ uñışları turındağı xäbärlärne kire qaqtı. Sabri Ğiraq köçläre ber amerikan oçqıçın bärep töşerde dip belderde. Ämma Pentagon äytüençä, Quşma Ştatlar älegä ber oçqıçnı da yuğaltmağan. Şimbä kiçendä

Ğiraq televideniese Prezident Säddam Xösäyenneñ üz kiñäşçeläre belän oçraşuın kürsätte. Televidenie xäbär itüençä, Säddam 3 oçraşu ütkärgän häm Ğiraq armiäseneñ qarşılığına qänäğätlegen beldergän.

Yäkşämbe irtäsendä dä Ğiraq suğışına qaşrı yaña demonstratsiälär ütte. Bügen Sidneyda şudnıy demonstratsiägä un meñläp keşe cıyıldı. Kiçä Berlinda demonstratsiägä 40 meñläp, Londonda 60 meñläp, Parijda 90 meñläp keşe çıqqan ide.

Naif Aqmal, Praga.
XS
SM
MD
LG