Kuwaitnıñ Qızıl Yarım Ay Oyışması bügen Ğiraq çige buyındağı Safwan şähärendä aşamlıqlar häm su tarattı. Humanitar yardäm yök maşinalarınnan biregän, bu çaranı Amerikan ğaskärläre küzätep torğan. Yardämne alırğa kilüçelärneñ qayberläre Säddäm Xösiänne yaqlawları turında söyläp torğannar dip xäbär itelä. Şulay uq Kuwait oyışması xezmätkärläre humanitar yardämne Umm Qasr şähärenä dä kiterergä planlaştıra. Şuşı könnärdä Umm Qasr portına 231 tonna aşamlıqlar, darular, eçär su häm yurğannar töyägän köymä kilep citergä tieş. Berläşkän Millätlär Oyışmasınıñ Dönya Aşamlıqlar Programmasınıñ matbuğat wäkile bügen, Ğiraqqa bu suğıştan soñ tarixtağı iñ zur humanitar yardäm kiräk bulaçaq, digän farazların äytte.
