26 martta Rusiä prezidentı Vladimir Putin “Единая Россия” firqäseneñ citäkçelegen qabul ite. Bu oçraşuda firqäneñ Yuğarı şurası räistäşe bularaq, Mintimer Şäymiev tä qatnaştı. “Единая Россия” 29 martqa bilgelängän qorıltayına äzerlänä. Oçraşu barışında qorıltaynıñ kön tärtibe, firqäneñ manifestı häm programması tikşerelde, dielä räsmi xäbärlärdä. Tatarstan mäğlümat çaraları Vladimir Putinnıñ “Единая Россия” citäkçelegen maqtawına, ayırım Mintimer Şäymievneñ abruyına, täcribäsenä iğtibar cälep itep, däwlät tözeleşe buyınça yış qına oçraşıp kiñäşüe turında äytüenä iğtibar itälär. “Единая Россия”neñ respublika bülege eşçänlege, anıñ totqan urını turında “Azatlıq” radiosı daimi söyläp kilä. “Единая Россия”neñ respublikada totqan urınına törle qaraş bar. Mäsälän, “Звезда Поволжья” yazuına qarağanda, Tatarstan kommunistları 3 meñläp respondent arasında soraşu ütkärgän: xäzerge waqıtqa Qazanda kommunistlarnıñ reytingı yaqınça 29%, ikençe urında - “Яблоко” (15% artıq), öçençe urında - “Единая Россия” (13%), annan soñ “Партия Жизни” (4%).
