Accessibility links

Кайнар хәбәр

AQŞ saqlanu ministere Rumsfeld, Ğıraq planın yaqlap çıqtı, fiker ayırmalıqlarınıŋ bulğanın kire qaqtı.


AQŞ saqlanu ministere Donald Rumsfeld Ğıraq suğışındağı pozitsiәsen yaqlap çıqtı. Xәbәr agentlıqları qayber amerikan xәrbilәreneŋ belderülәrenә tayanıp, amerikan kөçlәre tәminat yulların saqlau hәm Ğıraqnıŋ qarşılıq kürsәtüen hava hөcümnәre belәn yomışartu өçen Bagdatqa taba baru kiçekterelәçәk dip belderәlәr. " The New Yorker " jurnalı hәm qayber Amerikan informatsiә çaraları bu problemmalar өçen, Pentagon planlauçılarınıŋ küberәk ğәskәr hәm qoral kirәk digәn tәqdimen kire qaqqan Rumsfeldne ğәyeplilәr. Rumsfeld kiçә televideniәdә yasağan çığışında bu ğәyeplәvlәrne kire qaqtı.

Rumsfeld Fox News televideniәsenә birgәn interyusında planlauçılarnıŋ küberәk xәrbi kөç kirәk digәn tәqdimen kire qaqqan buluına qarağan ğәyeplәvlәr dөreslekkә turı kilmi dip belderde.

Audio

"Plan bik yaxşı, ul ğәdәttәntış yaxşı plan hәm bez ciŋәçәkbez. Bu plan general Tommy Franks tarafınnan әzerlәnde , Ştab başlıqları tarafınnan kamillәşterelde . Komandirlar tarafınan küzdәn kiçerelde hәm Milli Iminlek Şurası tarafınan raslandı. Bu ilneŋ planı . Ul yaxşı plan hәm eşli."

Saqlanu ministere suğışnıŋ küpmegә, atnalarğamı, aylarğamı- suzılaçağın aldan әytә almauın hәm kisken bәreleşlәrneŋ әle alda toruın belderde. General Franks , Qatardağı ştap kvartirda jurnalistlar belәn oçraşqanda Bagdatqa taba xәrәkәttә tәnәffes buluın kire qaqtı, 100 meŋlek өstәmә kөç Kuveytqa taba yulda hәm bu bөgelüçәn original plannıŋ ber өleşen tәşkil itә dip belderde. Qayber xәbәrlәrgә qarağanda, AQĞ saqlanu ministere, qayber әlkәn ofitserlarnıŋ Ğıraqta suğış başlaudan elek anda 91-nçe yılda bulğanı kebek yartı milionğa yaqın xәrbi ciarğa digәn tәdimen kire qaqqan bulğan. Ul azıraq sanda xәrbi citәr digәn fikerdә bulğan. Өstәmә kөçlәrne dә küz aldında totqana, Rumsfeld belәn Franks 91-nçe yıldağı xәrbilәrneŋ yartısı tirәsendә yәğni 250 meŋ xәrbi xezmәtkәr kitertü turında kompromissqa ireşkәn bulırğa tieşlәr. Britan jurnalı "Jane''s Defense Weekөy"neŋ süzçese Robert Hutchinson radiobızğa birgәn ntervyusında. berektәşlәr xәrbi plannı Ğıraqtağı çınbarlıqqa turı kilerlek itep üzgәrtәlәr dide.

Audio

"Minem fikeremçә, tәvәkkәllek belәn bәyle bulsa da suğış turında yaŋadan uylarğa kirәk. Minimum kөç, az sanda xәrbilәr ideasın yaŋadan tikşerergә kirәk. Küp qorbanğa sәbәp bulaçaq Bagdatta uram suğışın buldırmas өçen Çemhüriәt saqçılar qulındağı pozitsiәlәrnı alırlıq ut kөçe kirәk bulaçaq."

Rumsfeld, Franks hәm başqa sәyәsi hәm xәrbi citәkçelәrneŋ cәmağәtçelek aldında hәr nәrsә planlanğança bara dip belderülәre tabiği ber küreneş. Xata-yalğışlıqlar bulsa da, suğış barğanda monı ber kem dә iqrar itmi. Çөnki, bu berençedәn, ağımdağı hәm kilәçәktәge plannarnıŋ dөreslegenә şik belәn qarauğa kiteter, xәrbi xezmәtkәrlәrdә, ışnamauçılıq tudırır ide. Ikençedәn, dәşmannıŋ ruxi xәlәkәten kütәrer ide. Өçençedәn, citәkçelektә berdәmlekneŋ bulmauın kürsәter ide. Bolar suğışnıŋ barışına azmı-küpme tәsir itәrlek faktorlar. Şul sәbәple suğış barğanda yasalğan belderülәr tulı xәqiqәtne çağıldıra dip kөtep bulmıy. Lәkin, fronttağı amerikan xәrbilәrendә ruxi tөşenkelek küzgә çağılmıy. Bu xaqta Radiobıznıŋ amerikan xәrbilәre belәn berlektә xәrәkәt itüçe xәbәrçese Ron Synovits Kerbala yaqınındağı Hindiyah şәhәrennәn bügen bolarnı belderde.

Audio

"AQŞ xәrbilәreneŋ ruxi halәte yuğarı. AQŞ soldatları suğışnıŋ ber atnadan ozağıraqqa suzılaçağın belә idelәr. AQŞ sivillәrenә isә suğışnıŋ ozaqqa suzılmayaçağı әtelgәn ide. Soŋğı ike atnada amerikan kөçlәre ezlekle rәveştә alğa taba baralar. Logistik tәminat dәvam itkәn hәm alğa kitelgәn mөddәtçә, ruxi xalәt yuğarı bulıp qala birә. Inde Bagdat tirәsendәge pozitsiәlәrdә ike ay qalınğan xәldә, monıŋ AQŞ xәrbilәreneŋ ruxi xәlәkәtenә tiskәre tәsire bulaçaq. "

Radiobıznıŋ aldınğı front sızığındağı xәbәrçese Ron Sinovits bügen bolarnı belderde.

Fәrit Idelle,Praga.
XS
SM
MD
LG