İnde xäbär itkänebezçä, düşämbe könne Ministrlar Kabinetı utırışında Tatarstan prezidentınıñ 2003 yılda Däwlät Şurasına yullamasın ütäw programması tikşerelde. Älege waqiğanı taswirlauçı mäğlümat çaraları “Tatarstan däwlät säyäsäteneñ töp maqsatı – xalıqnıñ layıqlı tormış däräcäse häm tormış itü sıyfatı”, “Yullama kierenke eş taläp itä” digän baş aslarında çıqtılar. Layıqlı tormış däräcäse - ul berençe çiratta qulğa alıp eşlärlek eş, xezmät xaqı, torır urın-fatir. Eş, xezmät xaqı, toraq mäsäläse bıyıl bik kierenke. Şuña kürä Ministrlar Kabinetı utırışı da bik kierenke bardı. Premyer-ministr däwlät çinovnikların, xätta iñ yuğarı däräcädägelären – ministrlarnı, rayon administratsiäse başlıqların kisätte, tärtipkä çaqırdı. Xäyer, monısı inde zamançalıq, “bez keşedän kim meni” digännän qılınğan ğamäl dä bulırğa mömkin. Küptän tügel “Единая Россия” firqäse citäkçese Boris Grızlov “рыба гниет с головы”, yäğni “ balıq başınnan çeri” dip iñ yuğarı çinovniklarnıñ küñelenä şom saldı bit.
