Accessibility links

Кайнар хәбәр

Yaponiä häm Rusiä Tönyaq Koreanıñ atom töş programması tiräsendäge wazğiätne ''säyäsi häm diplomatik'' yullar belän çişergä çaqıra


Rusiä häm Yaponiä bügen yañadan Tönyaq Koreanıñ atom töş qoral programması tiräsendäge kierenkelekne “säyäsi häm diplomatik” çaralar belän çişergä çaqırdı. Rusiä saqlanu ministrı Sergei İvanov Tokyoda Yaponiä premyerı Junichiro Koizumi belän oçraştı. İvanov, Tönyaq Koreağa, ilgä Berläşkän Millätlär Oyışması inspektorların kertep atom töş cihazlarnı tikşerep çığarğa mömkinlek birüen sorap möräcäğät itte. Bu mäs’älädä Yaponiä belän Rusiä berdäm fikerdä, dide İvanov. Koizumi süzlärençä Tönyaq Korea tiräsendäge nizaq Rusiä, Qıtay, Yaponiä, Amerika Quşma Ştatları häm Könyaq Koreağa cäyelgän. Bügen Rusiä tışqı eşlär ministrı urınbasarı Alexandr Losyukov-Rusiä, Tönyaq Koreağa uzğan yıl kertelgän çikläwlärgä qarşı bulu fikeren üzgärtergä mömkin, dip belderde. Rusiä belän Tönyaq Koreanıñ qısqa ğına urtaq çik buyı bar. Ägär dä Tönyaq Koreanıñ atom programması bulıp Rusiä mänfäğätlärenä ziyan kiterä ikän, Rusiä dä Pxenyanğa kertelgän çikläwlärne yaqlıyaçaq, dide Losyukov. Tönyaq Korea citäkçese Kim Çin İr kiçä xärbi hawa bazasına baruında xärbilär aldında çığış yasağanda ğaskärlärneñ “agressiägä qarşı torırğa äzer buluların” häm “doşmannı ciñä alaçağın” belderde. Könyaq Koreada prezident Noh Moo Hyun –küzläw eşen alıp bara torğan köymäne açu tantanasında buldı. İke Koreanıñ da xärbi arsenalğa iğtibar arttıruınıñ nigezendä Tönyaqnıñ atom töş qoral programması tiräsendäge kierenkelek yata. Quşma Ştatlar Ğiraqtan soñ Tönyaq Koreağa höcüm itergä cıyına dip Pxenyan Waşington belän söyläşülär uzdırunı taläp itte. Läkin Amerika Quşma Ştatları söyläşülärne ber-niçä taraf qatnaşında oyıştırırğa teli.
XS
SM
MD
LG