Accessibility links

Кайнар хәбәр

Ğiraq şähärlärendä tärtip saqlaw eşe cayğa salına


Uzğan töndä Amerikan ğaskärläreneñ başqalada talaw häm urlawlarnı tuqtatu maqsatı belän başlağan şähärne saqlaw çaralarına- bügen Ğiraqlılar üzläre dä quşıldı. Berençe çiratta xastaxanälär saq astına alındı. Tönyaqtağı Kirkuk häm Mosul şähärlärendä başlanğan tärtipsezleklär dä betkän. Biredä tärtip saqlaw eşen Körd köçläre üz östenä alğan dip xäbär itelä. General Mam Rostam, Körd ğaskärläre Kirkuk şähärennän çığıp kitü turında wağdäsen ütiäçäk, dip belderde. Bağdadtağı Ğiraq Milli Muzeyınnan meñ yıllıq tarixı bulğan äsärlär urlanğan. Bu xaqta muzey direktorı urınbasarı Nabhal Amin xäbär itte. 170 meñnän artıq urlanğan yä cimerelgän tarixi äsärlärneñ bäyäse milliardlağan dollar dip isäplänä. Muzeyda borıñğı Mespotamiä çorınnan qalğan şumer häm ässüriä sänğate äsärläre saqlanğan bulğan. Tarixi äsärlär kürgäzmäse berençe Farsı qultığı suğışınnan birle yabıq torğannan soñ 2000nçe yılda ğına açılğan bulğan. Nabhal Amin-böten bu wazğiättä cawaplılıqnı amerikan ğaskärlärenä yökläde. Berläşkän Millätlär Oyışmasınıñ UNESCO agentlığı , koalitsiä köçlären, Ğiraqnıñ mädäni mirasın kiçekmästän üz kontrolenä aluın taläp itte. Ğiraq başqalasında sälämätlek saqlaw sistemasın yañadan başlap cibärü öçen Kuwait 20 tonna daru häm medetsina kiräk-yaraqları cibärgäne turında xäbär itte. 2 Amerikan transport oçqıçı kiçä Bağdadqa şuşı humanitar yökne kiterde. Kuwait sälämätlek saqlaw ministrı Mohammäd al-Jarallah, tağın darular häm azıq-tölek cibäreläçägen belderde. Jordaniä generalı Mohammäd al-İtan, Ammannan Ğiraqqa qır xastaxanäse häm darular kiläçägen xäbär itte. Xalıqara Qızıl Xac komitetı, Bağdad xastaxanälärendä xällär bik naçar dip, Amerikan ğaskärlärenä tabiplar häm cihazlarnı saqlarğa sorap yañadan möräcäğät itte. Ğiraq häm Kuwaittağı amerikan ğaskärlärenä Quşma Ştatları bayrağın cilferdätmäskä quşıldı. Cirle xalıq monı döres añlamasqa mömkin dielä färmanda. Amerikan xärbiläre üz bayrağın Umm Qasr portın alğaç quydı häm Bağdadta Säddäm Hösäin häykälen cimerergä tırışqanda bayraqnı häykäl östenä meñgerde. Xärbi citäkçelär-amerikan bayrağın cilferdätü Ğiraqta Quşma Ştatlarğa qarata ışanmawçanlıq tudıra ala, dip kisätte.
XS
SM
MD
LG