Amerikan generalı, Ğiraqtağı ğaskärlär başlığı Tommy Franks, yuğalğan dip isäplängän 7 amerikan xärbie tabıldı, dip xäbär itte. Franks üze bu xaqta tulıraq mäğlümat birmäde, läkin CNN televideniäse, amerikan ğaskärläre bu yuğalğan xärbilärne Bağdadtan tönyaqqa taba barğanda tapqannar häm alar isän-saw dip belderde.
Amerikan xärbiläre wäkile general Vincent Brooks, tabılğan 7 keşene –“suğış totqınnarı” dip atap bulmıy, dide.
“Äle min alarnı “suğış totqınnarı” dip atamas idem, bez alarnıñ isemnären häm däräcälären açıqlarğa tieş. Läkin bez alarnıñ amerikan ikännären beläbez häm alar xäzer bezneñ belän bergä” dide Brooks.
Amerikan ğaskärläre Säddämneñ tuğan şähäre bulğan Tikritqa kergännär, koalitsiä köçläre şähärne äle tulı kontrolgä ala almıy, Tikritnıñ tirä yaqlarında Ğiraq köçläre belän bäreleşlär bara. Başqala Bağdadta bügen wazğiät çağıştırmaça tınıç buldı, dip xäbär itelde, läkin barıber qaysı ber rayonnarına urlaw häm talawlar däwam itkän.
Ğiraqnıñ qayber şähärlärendä elekke rejimda politsiä bulıp xezmät itkän köçlär tärtip saqlaw eşenä kereşte. Mosul şähärendä amerikan ğaskärläre uramnarda tärtip saqlıy, qayber kibetlär açıldı, dip xäbär itelä.
Bügen Bağdad üzägenä eş ezläp yözlägän Ğiraqlı ağıldı. Anerikan ğaskärläre xäbär itüençä, berençe çiratta keşelärne politsiägä xezmätkä alalar. Quşma Ştatlar xärbilärenä bu könnärdä Ğiraqta tärtip urnaştıra almawları, urlaw häm talawlarğa yul birüläre öçen täñqit yawdı.
Waşingtonda cıyılğan iqtisadi alğan kitkän 7 il wäkilläre Ğiraqnı tözekländerü eşen berlektä başqarırğa kileşte.
