Accessibility links

Ğiraq suğışı: 25.kön yañalıqları


Ğiraq suğışınıñ 25nçe köne tämamlandı. Ğiraqtan kilgän xäbärlärne yañadan isegezgä töşerep ütäm. Säddäm Hösäinneñ tuğan şähäre Tikrit öçen bäreleşlär däwam itä. Amerikan maxsus xärbiläre-marinnar belän bergä yörgän ber Kanada jurnalistı, şähärneñ könyağındağı bäreleşlärdä 250gä yaqın amerikan xärbi maşinaları qatnaştı, alarğa hawadan boralaqlar yardäm itte, dip xäbär itte. Frans Press mäğlümat agentlığı, şähärdä atışlar häm artilleriä tawışı işetelep tordı, dip belderde. Koalitsiä köçläre başlığı amerikan generalı Tommy Franks, Amerikan ğaskärläre Tikritqa kergändä Ğiraq köçläre tarafınnan qarşılıq yuq diärlek ide, dide. Şul uq waqıtta Ğiraqnı tözekländerü eşeneñ cayğa salınuı öçen xalıqara säxnädä tärräqiät däwam itte. Fransiä tışqı eşlär ministrı Dominique de Villepin üzeneñ Farsı qultığı däwlätläre buylap säfären tämamlıy, bügen De Villepin Söğed Ğaräpstan tışqı eşlär ministrı şaxzadä Säüd Al-Faisal belän oçraştı. Söyläşülärdän soñ ğaräp şaxzadäse, Fransiä häm Söğed Ğaräpstannıñ ike mäs’älädä kileşkän buluların belderde-berençese-Ğiraq belän Ğiraq xalqınıñ ğına idarä itüe häm ikençese-ildä tınıçlıq häm totrıqlılıq buldıru öçen kiçekmästän çaralar kürü turında. Bu xaqta Frans Press xäbärlär agentlığı belderde. Bu töbäkkä säfären bügen Britaniä tışqı eşlär ministrı Jack Straw başladı. Amerikan saqlanu ministrı Donald Rumsfeld bügen CBS televideniä çeltärenä birgän äñgämäsendä, Ğiraqta tınıçlıq saqlaw eşenä NATO qatnaşsa “yaxşı bulaçaq” dide. Şulay uq, Ğiraqnı tözekländerü eşenä bik küp illär qatnaşaçağın äytte Rumsfeld. Ägär dä Fransiä Ğiraqqa NATO ğaskärlären kertügä qarşı çıqsa bu adım barıber ğamälgä aşa ala, dip östäde Rumsfeld. Fransiä –NATOnıñ töp qarar birüçe Saqlanunı Planlaştıru Komitetı äğzase tügel. Kiläse atnada Ğiraq pozitsiäse wäkilläre qatnaşında uzaçaq cıyınnarda Ğiraqnıñ küçeş çorı xakimiäteneñ ölgese turında da söyläşülär başlanaçaq. Alsu Qormaş, Praga
XS
SM
MD
LG