Qabul. Äfğanstannıñ ber räsmi wäkile belderüwenä qarağanda, könyaq-könçığıştağı Zabul wilayätendä cirle iminlek köçläre belän bulğan bäreleştä, “Taliban” suğışçısı buluda şiklänelgän 10 keşe yuq itelgän. Şul wilayätneñ xakime Xämidulla Toxi, “Taliban” köçläre şimbä könne höcüm başlap cibärde, suğışlar äle dä däwam itä dip belderde. Ul şulay uq “Taliban”nıñ 10 keşesen üterüdän tış cirle xakimiat köçläre alarnıñ 6-sın yaraladı dip tä äytte. Älege bäreleşlär turında başqa mäğlümat älegä alınmadı. Ul arada bügen irtäräk Berläşkän Millätlärneñ häm Äfğanstannıñ üzendäge keşe xoquqların yaqlawçı oyışma wäkilläre, üzğan ayda tönyaq-könbatış Äfğanstandağı suğışlar waqıtında doşmanlaşqan taraflarnı awır cinayätlär qıluda ğäyepläp çıqtı. Alar bäyän itkän urtaq belderüdä, Akazi awılında uzğan ayda kimendä 38 keşe üterelgän, şularnıñ 26-sı maxsus cäzalanğan, cirle xakimiat monıñ öçen cawaplı zatlarnı tabarğa tieş dielä.
