Buenos Aires. Tirän iqtisadi krizis kiçergän Argentinada bügen prezident saylawları bara. Tawış birü xoquqı bulğan 25 yarım million argentinalı barlığı 18 nämzät arasınnan xäzerge prezident Eduardo Duhalde warisın saylarğa tieş. Belgeçlär fikerençä, saylanu ixtimalı şularnıñ 5-endä genä bar, läkin alarnıñ da härbersen yaqlaw däräcäse älegä 20 protsenttan da kim, şuña kürä tawış birüneñ ikençe turın ütkärü dä bik mömkin. Ul maynıñ 18-endä uza ala, 25-nçe mayda isä yaña prezident inde üz wazifaların ütäwgä kereşergä tieş bulaçaq. Östenlek elekke prezident Carlos Menemgä, xäzerge däwlät başlığı Duhalde yaqlağan Nestor Kirchnerğa, uñçı iqtisadçı Ricardo Lopez Murphygä, Argentinanıñ San Luis wilayäte xakime Adolfo Rodriguez Saağa häm elek universitetta uqıtqan Elisa Carrioğa birelä. İnde äytelgänçä, Argentina bügenge köndä tirän iqtisadi krizis kiçerä, andağı 36 million xalıqnıñ yartısı fäqirlek däräcäsennän dä tübän şartlarda yäşi, eşsezlek 25 protsentnı täşkil itä.
