Bügen Tailand başqalasında könyaq könçığış Asiä däwlätläre ASEAN başlıqları SARS virusınıñ taraluı turında söyläşer öçen çirattan tış utırışqa cıyıldı. Dönya Sälämätlek Oyışması, epidemiä tuqtatılmasa, SARS-keşelär arasında taralğan ğadäti awıruğa äylänergä mömkin, dip çañ qağa. Oyışma wäkile doktor David Heymann süzlärenä qarağanda här il xökümäte-ber genä awırıp kitkän keşe bulsa da-monı centekläp tikşeterergä häm çirneñ baqalarğa yoğuın buldırmasqa tieş, dip belderde. İñ awır xäldä Qıtay. Sälämätlek Saqlaw sisteması SARS virusın ciñä almıy. Qıtay tışqı eşlär ministrlığınıñ matbuğat wäkile Liu Jinchao, Bankoktağı oçraşu SARSqa qarşı köräştä möhim adım dip belderde. “Bügenge köndä SARS-böten xalıqara cämäğätçelekkä qurqınıç tudıra. Qıtay xökümäte bu cıyınnı bik möhim dip sanıy, utırış barışında bez dä üz täqdimnärebezne kertäçäkbez. SARS tudırğan qurqınıçnı xezmättäşlek aşa kimetergä uylıybız”, dide Qıtay wäkile.
Tai premyer-ministrı Thaksin Şinawatra, Qıtay häm ASEAN illäre, SARSnı kontroldä totır öçen urtaq fond buldırırğa kileşte, dip xäbär itte. Qıtay yağı fondqa 1 million 200 meñ dollar aqça birüe turında beldergän.
