Accessibility links

Кайнар хәбәр

Ğiraq tışqı eşlär ministrlığına xezmätkärlärne waqıtlı xakimiät başlığı Jay Garner saylıy


Koalitsiä köçläre Ğiraqnıñ tışqı eşlär ministrlığı xezmätkärläre wazifalarına keşelärne saylıy. Bu xaqta waqıtlı xakimiät başlığı Jay Garner Bağdadta ministrlıqnıñ talanğan häm yandırılğan binasında bulıp kitkännän soñ belderde. Ministrlıqnıñ elekke wäkilläre-Säddäm Hösäinneñ Baath partiäse äğzaläre bulğan. Garner süzlärençä alar arasınnan tsitata-“naçar” häm “yaxşıların” saylap alınaçaq. Bügen Britaniä premyer-ministrı Tony Blair, tağın ber tapqır, xalıqara cämäğätçelekne häm Berläşkän Millätlär Oyışmasın Ğiraqnı tözekländerü eşenä qatnaşırğa çaqırdı: “Ğiraqta uñışqa ireşer öçen xalıqara cämäğätçelek häm Berläşkän Millätlär Oyışmasınıñ berlektä eşläwe möhim. Şulay uq kiçekmästän suğıştan soñğı tözekländerü çorın başlarğa kiräk, Ğiraq xalqı kürergä telägän şartlar häm infrastruktura buldıru möhim”, dide Blair. Britaniä xökümäte başlığı Londonğa kilgän Australiä premyer-ministrı John Howard belän oçraştı. Bügen irtän Amerikan xärbi köçläreneñ üzäk idaräse Ğiraqta elek Baath partiäseneñ Kut şähärendäge cirle yulbaşçısı bulğan Ğazi Hammud qulğa alındı dip xäbär itte. Azerbaycan parlamentı Ğiraqqa tınıçlıq saqlaw missiäse belän 150 xärbine cibärü täqdimen xupladı. Saqlanu Ministrlığınıñ xalıqara Xezmättäşlek Bülege wäkile Ramiz Najafov, ğaskärlär tärtip saqlıyaçaq, qanunnarnıñ ütäleşen kontrol itäçäk, dini häm tarixi xäykällärne saqlıyaçaq, dip belderde. Azerbaycan ğaskärläre Kuwaittağı Amerikan bazasına düşämbe könne kilep citep, Kirkuk, Kerbala, Mosul häm Najaf şähärlärenä urnaşaçaq. Bügen şulay uq Bolğarstan Saqlanu ministrı Nikolay Svinarov Ğiraqqa 450 keşelär ğaskärlär cibärü turında xökümätkä täqdim yasıy. Svonarov süzlärenä qarağanda, Bolğarstan xärbilär –Polşa köçläre citäkçelek itkän töbäktä tınıçlıq saqlıyaçaq. Polşanıñ-Ğiraqta Daniä-Germaniä-Polşa xärbi köçläre tözü täqdimenä Germaniä xökümäte qarşı çıqtı. Germaniä saqlanu ministrı Peter Struck –bu xaqta bügen Copenhagenda söyläşülär uzaçaq dip xäbär itsä dä kancler Gerhard Schroedernıñ matbuğat xezmäte-Ğiraqqa ğaskärlär cibärü plannarı yuq, dip belderde. Törkiädä säfärdä bulğan Rumıniä premyer-ministrı Adriane Nastase, Ğiraqnı tözekländerüdä Törek häm Rumın şirkätläreneñ bergä eşläwen täqdim itte. Premyer-ministr Recep Tayiip Erdoğan belän bulğan söyläşülärdä süz säwdä häm töbäkara mäs’älälär turında barğan. Rumıniä häm Törkiä arasında uzğan yılda 1 milliard dollarlıq säwdä qılınğan. Şulay uq Rumıniä premyer-ministrı Törkiä prezidentı Ahmet Necdet Sezer belän oçraştı
XS
SM
MD
LG