Kiçä kiç Söğed Ğaräpstan başqalasınıñ çit il keşeläre yäşägän rayonında bulğan şartlaw näticäsendä 30ğa yaqın keşe häläk bulğan. Eçke eşlär ministrlığı xäbär itüençä, ülüçelär arasında 7 amerikan watandaşı, 7 söğüdi, 2 jordanlı, ike filipinlı, ike livanlı häm ber Sveytsariä watandaşı bulğan. Tağın 9 mäyet-intixarçılarnıqı dip farazlana. Amerika Däwlät Sekretare Colin Powellnıñ kilüenä ber-niçä säğat kenä qalğanda bulğan terror höcümendä194 keşe yaralanğan. Bügen Powell Riyadh’qa kilde. Ammannan kiter aldınnan, Powell-terrorğa qarşı köräş-Amerika Quşma Ştatları öçen töp burıç bulıp qala, dip belderde.
Jordaniä başqalası Ammanğa säfär yasağan Yevropa Berlegeneñ tışqı säyäsäte başlığı Javier Solana, Riyadh’ta bulğan terror höcüme böten töbäkneñ totrıqlılığına qurqınıç tudıra, dip belderde. Solana, İsrael häm Fälestin arasında tınıçlıq urnaştıruğa bağışlanğan säfären däwam itä. Qahirä häm Ammandan soñ Solana Söğed Ğaräpstan, İsrael, Fälestin, Syriä häm Livanğa baraçaq.
Dönya citäkçeläre dä Riyadh’ta bulğan terror höcümnären kisken täñqitläp belderülär yasadı. Germaniä tışqı eşlär ministrı Joschka Fischer, Söğed Ğaräpstanda bulğan xällär-xalıqara terrorğa qarşı köräşne tağın da qırısraq alıp baru kiräklegen kürsätte, dide. Rusiä prezidentı Putin-Riyadh’ta bulğan höcümnärne kiçä Çeçnyada bulğan şartlaw belän çağıştırdı.
