Rusiä başqalası amerikan däwlät sekretaren, "Çeçnä häm Söğüd Ğäräbstanındağı terror ğämälläre Mäskäw häm Waşingtonnı ber-bersenä yaqınayta ala" digän gazeta başları belän qarşı aldı. Powellnıñ Rusiä citäkçeläre belän ütäçäk söyläşüläre başta Ğiraq häm anıñ tiräsendäge xällärgä bağışlanır dip kötelsä dä, atna başında söğüd başqalasında bulğan şartlawlar Mäskäw oçraşularınıñ kön tärtibenä üzgäreşlär kertmi qalmadı. Mäğlüm ki, Rusiä prezidentı Vladimir Putin şunda uq, Çeçnä häm Söğüd Ğäräbstanındağı şartlawlar ber-bersenä bäyle, alarnı berük köçlär oyıştıra dip belderde. Andıy belderülärne Rusiä, çäçännärneñ bäysezlek öçen köräşen xalıqara terrorğa bäylärgä tırışıp elek tä yış yasıy ide. Amerikannarda awır xislär uyatqan Riyadtağı xällärne Mäskäw bu yulı da üz faydasına qullanırğa tırışa ala. Läkin xäzer ikeyaqlı aralar beraz qatlawlıraq häm Rusiä citäkçelegenä Quşma Ştatlarnıñ mönäsäbäten yaxşığa taba üzgärtü awırraq bulaçaq. Ğiraq suğışı mäs''äläsendäge qarşılıqlar, suğış inde üze nigezdä tämamlansa da, haman da qala birä. Xäzer köräş mäydanı yänä Berläşkän Millätlärneñ İminlek Şurasına küçärgä tora. Waşington Şurağa, Ğiraqqa qarşı çikläwlärne kiçekmästän ğämäldän çığarunı küz aldında totqan yaña qarar ölgese täqdim itte. Mäskäwdän isä bu ölkädä bik aşıqmasqa kiräk digän belderülär işetelde. Waşington İminlek Şurasınnan şulay uq, Ğiraq neften satunı amerikan-britan idaräsenä tapşıruğa da fatixa alırğa teli. Saddam çorında Ğiraqnıñ neft industriäsenä nıq bäylängän Rusiä öçen moña rizalıq birü bik awır taşlama yasaw bulır ide. Ämma Mäskäwneñ qarşılıq kürsätü mömkinlekläre bik çiklängän, citmäsä may azağında Vladimir Putin Piterburnıñ 300 yıllığı tantanalarında Quşma Ştatlar prezidentı George Bush belän oçraşırğa cıyına. Şuña kürä ike il dä üzara qarşılıqların añançı niçek tä bulsa xäl itärgä tieş, Powellnıñ Mäskäw säfäre töp maqsat itep şunı quya. Amerikannarğa Putinneñ soñğı märtäbä britan premyer-ministrı Tony Blair belän niçek itep söyläşüwe oşamadı. Mäskäw belän Waşington araların beraz caylaw niäte belän kilgän Blairnı Rusiä prezidentı asılda açıqtan-açıq yañaqladı, ul amerikan-britan berektäşlegeneñ Ğiraqtağı suğışın, anda bernindi dä küpläp yuq itü qoralları tabılmaw säbäple buşqa kitkän eş dip bäyäläde. Xäzer inde amerikannar da, Mäskäwdä andıy käyeflär östenlek itkändä, Bushnıñ Piterburğa kilüwe ni belän tämamlana ala dip baş wata. Ä Waşingtonnıñ Rusiä citäkçelege belän tikşererlek möhim ber probleması bar - anı torğan sayın nığraq Mäskäwneñ Tähran belän xärbi ölkädäge xezmättäşlege borçıy. Amerikan yağı Rusiä asılda İranğa üz atom qoralın buldıruğa yardäm itä dip isäpli. Mäskäw dä, räsmi Tähran da monı kire qağa, älbättä, läkin äl-Qai''dä kebek terror törkemeneñ üz qulına qayçan da bulsa, İran tösle totrıqsız ber däwlättän atom qoralı töşerä alu ixtimalı Quşma Ştatlar citäkçelegen nıq borçıy. Bu uñaydan Mäskäw amerikannar öçen küñelle ber qarar da qabul itte, çärşämbe könne Rusiäneñ Däwlät Duması, ozaqqa suzılğan kiçekterülärdän soñ Quşma Ştatlar belän Rusiä arasında, atom qoralları sanın kimetü turındağı soñğı kileşüne raslarğa buldı.
Powellnıñ Mäskäw säfäre Putin-Bush oçraşuwına qädär ikeyaqlı qarşılıqlarnı xäl itärme?
Söğüd Ğäräbstanınnan Rusiägä kilgän amerikan däwlät sekretare Colin Powell, çärşämbedä Mäskäwdä tışqı eşlär ministrı İgor İvanov belän oçraşıp, terrorğa qarşı köräştän alıp Ğiraq neftenä xätle bulğan mäs''älälärne tikşerde.