Başqa waqiğälär säbäple Ğiraq suğışı inde äkrenläp küz qırınnan yuğala da bara. Rusiäneñ säyäsi torımışında isä älege suğış iğtibarğa layıq başqa berniçä waqiğä belän bilgelände. Säyäsi partiälär häm cämäğätçelek nigezdä sülpänlek kürsätsä, Rusiädäge töp möselman oyışmalarınıñ berse Quşma Ştatlar häm anıñ Ğiraq suğışındağı berektäşlärenä qarşı cihad iğlan itte. Äye, bu çınnan da şulay, cihad uzğan ayda, "Berdäm Rusiä"neñ Ufada uzğan cıyınında iğlan itelde, şul belderü Rusiä möselmannarınıñ Üzäk diniä nazäräte räise möfti Tälğät Tacetdin tarafınnan yasaldı. "Bez xäyriälär xisabına ber waqıf tözep, şul aqçanı Amerikağa qarşı suğışu öçen qorallar aluğa häm Ğiraq xalqı öçen azıq-tölek cibärügä totaçaqbız" dip belderde möfti Tacetdin. Şuşı belderü Mäskäwdäge amerikan ilçelege, ilneñ baş prokuraturası, yustitsiä ministrlığı, Tacetdinneñ köndäşe möfti Rawil Ğäynetdin citäklägän Rusiä möftiläre Şurası yağınnan şunda uq kisken tänqitlände. Ufadağı möftiät isä "cihad" süze belän Tälğät Tacetdin küz aldında barı tik ruxi bäreleşne genä tottı dip añlatırğa tırıştı. Qayber küzätüçelär fikerençä, Üzäk Diniä nazäräteneñ şuşı ğämäle cämäğätçelek arasında kiñ taralğan xislärne çağıldıru ğına bulıp tora. Läkin bar şuşı qıssanıñ ber qızıq yağı bar, di "Moscow Times" basmasındağı mäqäläne yazuçı Nikolay Petrov. Yaxşı yazılğan ğädäti äsärdäge kebek ük, cihad qıssasında, bernindi dä oçraqlı närsägä urın qaldırmağan, waqıt häm urınnıñ berdämlege prinsibı yata. Näq menä aprilneñ başında Vladimir Putin, başta Tambovta, ä annarı Mäskäwdä, awırlıqlarğa qaramastan Rusiäneñ Quşma Ştatlar belän mönäsäbätlären täräqqi itärgä kiräk dip, amerikannar yağına awışa başlağan ide. Cihad iğlan itüneñ Ufada, "Berdäm Rusiä" cıyınında buluwı da oçraqlı tügel, xakimiat partiäse möselman faktorın daimi qullana. "Moñardan kem fayda kürä soñ?" dip sorıy "Moscow Times"tağı mäqälä avtorı. Häm üze ük cawap ta birä. "Putin öçen bu, Quşma Ştatlarğa üzeneñ, möselmannar da bulğan xalqı belän nindi awırlıqlar belän idarä itüwen kürsätügä menä digän mömkinlek bulıp tora" di Nikolay Petrov. Anıñ süzlärençä, alda äle saylawlar da torğanda bu xakimiat partiäse öçen, Tacetdin oyışmasındağı radikal'' möselmannarnıñ tawışların qazanu maqsatında da eşlänä ala. Tacetdin möselman saylawçıları öçen İgor'' İvanov eşen başqara digän fiker belderä, atnakiç "Moscow Times" basmasında dönya kürgän mäqäläsendä, Mäskäwdäge säyäsi wä geografik tikşerenülär üzäge citäkçese Nikolay Petrov.
Kärim Kamal, Praga.
Kärim Kamal, Praga.