Accessibility links

Кайнар хәбәр

"Sigezlek"neñ Evian oçraşuwı häm Bush-Chirac söyläşüläre


Şuşı atna möhim waqiğä, 7 industrial'' il häm Rusiä citäkçeläreneñ yuğarı däräcädäge yıllıq oçraşuwı belän başlandı, xörmätle tıñlawçılar. Bıyıl anda süz berençe çiratta dönya iqtisadın kütärü häm küpläp yuq itü qoralların cäyeldermäw çaraların kürü turında bara. Ayırım iğtibar amerikan prezidentı Bushnıñ, Ğiraq suğışına qarşı çıqqan fransuz prezidentı Chirac belän oçraşuwına da birelä.

Qısqaça "sigezlek" dip kenä atalğan şuşı törkemneñ oçraşuwı asılda yäkşämbe kiçen ük, räsmi bulmağan aş mäclese belän açıldı, xörmätle tıñlawçılar. Anda alarğa qayber "öçençe dönya" illäreneñ citäkçeläre dä quşıldı, iğtibar üzägendä fäqirlekkä qarşı dönyaküläm çaralar kürü mäs''äläse tordı. Düşämbe irtänge utırışta da nigezdä iqtisadi problemalar qaraldı, mäğlüm ki dönya iqtisadınıñ xäle, 20-nçe ğasırnıñ soñğı unyıllığı belän çağıştırğanda soñğı ber-ike yılda şaqtıy qaqşadı, bigräk tä Yewropadağı täräqqiat zur borçu tudıra. Şuña da "sigezlek" citäkçeläre ruxnı kütärü maqsatında, neft bäyäläreneñ töşüwe häm industrial'' illärneñ üzara säyäsi xezmättäşlegen yañartuwı, dönya iqtisadınıñ üsüwenä ömet uyata digän işarälär yasadı. Ğiraq suğışı häm anıñ Könbatış illären ikegä ayıruwı, iqtisadçılarda kiläçäkneñ şaqtıy bilgesez bulu qurqınıçın uyatqan ide, xäzer inde "sigezlek"neñ säyäsi citäkçeläre şul qurqularnı taratırğa tırışa. Bu uñaydan zur iğtibar, Ğiraq mäs''äläsendä üzara köndäşkä äylängän ike prezident - George Bush häm Jacques Chiracnıñ niçek söyläşülär ütkärüwenä, monıñ küpme baraçağına birelde, Eviandağı xäbärçelär xätta ike prezidentnıñ niçä sekund qul qısışıp toruwın da sanap tordı. Piterburda çaqta Putin belän duslıqnı yañartqannan soñ Bushnıñ Fransiä citäkçesenä nindi möğämälä kürsätäçägenä iğtibar, bar "sigezlek" oçraşuwına birelgän diqqätkä tiñ ide diärgä bula. Läkin şuşı ike prezident aradağı qarşılıqlarnı xalıq aldına çığarmasqa buldı. Alarnıñ qısqa, läkin yılmayular belän ütkän oçraşuwı, yaqlarnıñ elekke qarşılıqlarğa basım yasamıy ğına alğa taba barırğa tırışuwın kürsätergä tieş ide. Quşma Ştatlar prezidentı George Bush.

Audio, George Bush

"Qarağız äle, äydägez açıqça söyläşik, bez bik qatlawlı çor aşa üttek. Min anıñ, yäğni Chiracnıñ Ğiraq mäs''äläsendäge qaraşın añlıym, ul anı miña aldan uq belderep quydı" di amerikan prezidentı häm, "şuña kürä dä min, bezneñ aralar äybät, çönki bez ber-berebez belän açıq bula aldıq" digän süzlär äytä. Fransuz prezidentı da üzeneñ Bush belän küreşüwennän bik qänäğät qaluwın, anıñ uñay ütüwen, söyläşülär barışında dönyanıñ kiläçäge mäs''äläsendä urtaq ömetlär bağlanuwın, ğomumän Bushnı "sigezlek" oçraşuwı qısalarında qabul itüneñ Fransiä öçen dä, üze öçen zur xörmät buluwın belderde.

Audio, Jacques Chirac

Yäkşämbedä Fransiä prezidentı üzeneñ häm küpçelek keşelärneñ dönyanı, küpqotıplı, küp üzäkle itep kürergä teläwe xaqında söyläsä dä, düşämbedä ul amerikannar belän xezmättäşlek itü kiräklegenä basım yasadı, häm kiçen Yaqın Könçığışqa yul totqan Bushqa, anıñ anda solıx urnaştıru tırışlıqlarına uñışlar teläde.

Audio, Jacques Chirac

"Prezidentnıñ Yaqın Könçığışnı telgä aluwı uñayınnan min, anıñ bügen kiç Mısırdağı Şarm-äl-Şäyextä ütäçäk oçraşuwı uñışlı bulır digän teläk belderäsem kilä" di Fransiä prezidentı Jacques Chirac. Şulay itep, "sigezlek" illäreneñ citäkçeläre Eviandağı oçraşuwın däwam itä, alar anda urtaq belderü qabul itärgä tieş, ä amerikan prezidentı solıx eşe belän Yaqın Könçığışqa yul tota.

Kärim Kamal, Praga.
XS
SM
MD
LG