Rusiäneñ här töbägendä diyärlek Saban tuylar ütä.

Saban tuyı Tatarstan bäyräme genä tügel. Böten tatar xalqınıqı da. Volgograd, Tolyati, Sarı taw häm Ästerxanda Saban tuyları inde ütte. Respublika xökümäte tatarlar yäşägän töbäklärdä Saban tuylar ütkärüne däwlät küläm çara itep atıy. Şuña kürä, xökümättä, räsmi keşelärdän här töbäk öçen cawaplı bilgelänep, kemneñ qaya baraçağı turında plan tözelgän. Şuşı plan nigezendä, Tatarstan sälimnären Ästerxanğa Elemtä ministrı Rinat Cäläev citkerde, deputatlar häm tatar cämäğätçelege isemennän – Foat Ğalimullin çığış yasadı. Ä Ästerxandağı millättäşlärebezneñ küñelen respublikanıñ cır häm biü ansamble kütärde.

12 yündä milli bäyrämebez Mari El başqalası Yoşqar-Ola şähärendä, İvanovo ölkäseneñ üzägendä, Muromda häm Tobolda bulaçaq. Anıñ irtägäsendä 13 yündä – Yaroslavl’däge milläşlärebezneñ bäyräme uzar. 14-ndä Yekaterinbur tatarları häm başqortları mäydanğa cielaçaq. Şul uq, könne Malmıc tatarları da bil alışaçaq. 15ndä – Surgutta, Kirov ölkäsendä häm Komi respublikasında milli bäyrämne ütkärergä uylap toralar.

İñ zur Federal Saban tuyı 14 yündä, Ulyanov ölkäseneñ Demitrovgrad şähärendä ütärgä tieş. Anda Tatarstan xökümätennän vitse-premyer, Tatar kongressı citäkçese, «Zaman» törkeme häm başqalar barırğa isäpläp tora.

21 yüngä Orenbur ölkäseneñ Totskiy rayonında, Penza ölkäseneñ Urta Äläzän awılında, Kemerovo ölkäseneñ Prokopyevskiy şähärendä tatar häm başqortlar bäyräm itäçäk. Annan soñğı atnalarda Çiläbe, Udmurtiäneñ Sarapul häm Mocğa şähärlärendä, Töbän Novgorotta, Samarada, Permdä, Krasnoyarskiyda, Omskiy häm Adigeyadağı Saban tuylar planğa kertelgän. Milli bäyrämebez şulay uq 5 iyüldä Mäskäwdä häm İjawda, 6 yulda Arxangelsk häm Tömändä, 12 iyuldä Soçi şähärendä, 20sendä – Mordoviäneñ Lämberä rayonında ütärgä tieş.