Accessibility links

Кайнар хәбәр

İqtisat, xucalıq tormışı häm ekologiä xäbärläre.


Çärşämbe irtäsendä xökümät binasında sänäğät şirkätläreneñ berençe kvartaldağı eşçänlegenä yomğaq yasaldı. Tatstroy aksionerlıq cämğiäte aksionerları ximiklar mädäniät sarayında yıllıq cıyılış ütkärde. Livadiä sanatoriendä sotsial'' yaklaw sistemasınıñ 85 yıllığına bağışlanğan tantanalı cıyılış buldı, anda Däwlät Sovetı räise Färit Möxämmätşin qatnaşıp, räsmi qotlaw süzlären citkerde.

Färit Möxämmätşinneñ räsmi çaralarda sişämbe häm çärşämbe könnärendä Rusiäneñ zur bäyrämnäre uñayınnan täbrikläp çığış yasawı aptıratmasın. Bu respublika citäkçeläreneñ eş büleneşe. Prezident Mintimer Şäymiev üz urınında, ul bik möhim çaralar ütkärä häm oçraşularğa äzerlänä dip äyttelär räsmi strukturanıñ xezmätkärläre. Yäkşämbe könne ul Sankt-Peterburgqa barıp, şähär yubileyına bağışlanğan çaralarda ğına tügel, bik zur dairälär belän oçraşırğa mömkin dip sizderdelär mäğlümatlı keşelär. Ul bik zur zatlarnıñ isemnären äytep tormıybız, ämma Tatarstanda bu könnärdä Rusiädäge säyäsi bäyge cilläre sizelä.

Äytik, sişämbe könne Narodnaya partiäneñ selektor cıyılışın Qazanda da tıñladılar. Sovet kunakxänäsendä urnaşqan ofista Narodnaya partiä wäkillärennän başqa berniçä jurnalist ta Raykovnıñ urınbasarı Gal''çenko, Tatarstannıñ Dumadağı deputatı Flyura Ziätdinova qatnaşlığında kiñäşmäne tıñlap tordılar. Yäşeren-batırın tügel, bu firqäneñ Tatarstandağı wäkilläre ber-bersenä oxşamağan. Sergey Şaşurin Narodnaya partiäneñ tayanıçı dip üzen xis itä. Ul Duma saylawında İdel buyı okrugın ıçqındırmasqa tırışaçaq. Flyura Ziätdinova şul uq firqäneñ yoldızı bulsa da, bötenläy başqa platformada. Ul Tatarstan mänfäğätlären bik qayğırta, respublikanıñ räsmi säyäsätenä yärdäm itärgä tırışa. Äle anda Sälimxan Axmetxanov digän ber deputat ta bar. Busı inde xäzer Çallıdan saylatıp cibärgän xakimiät resursına ömet itmiçä, tuğan yağın qähärläp yañadan deputat bulmaqçı. Menä şul şäxeslär Narodnaya partiäne Tatarstanda üsterergä cıyınalar. İñ ähämiätlese şul, Narodnaya partiä Yedinaya Rossiägä quşılmayaçaq ikän. Ul üzenä saylawda 5 protsent tawış cıyıp, möstäqil firqä bulmaqçı. Bu partiä Agrar firqä häm Sportivnaya Rossiä belän qul totışırğa bulğan. Moñı qädär Yedinaya Rossiäneñ ber tägärmäçe bulıp sanalğan firqäneñ mondıy belderüe selektor kiñäşmäsenä kilüçelärne şaqqatırğan. Bolay bulğaç, älege superfirqä Yedinaya Rossiä bik yalğız häm mesken xäldä qalmasmı? Bäyräm könnärendä yedinoroslar Qazanda miting, Çallıda forum ütkärergä cıyınalar. Dimäk, eşlär qızu kitkän bit. Yedinaya Rossiäneñ aldında asfal''t yullar tüşälmägän, Vladimir Putin anıñ awızına känfit qaptırıp, başın sıypap torır mikän? Xäzergä äle Tatarstanda bu näzberek xällärne belmilär.

Tanış jurnalistlar bik ışandırıp äytkänçä, kommunistlarnıñ respublika oyışması plenumında Aleksandr Saliyğa qänäğätsezlek kürsätkännär. Qarşılıq şaqtıy kisken bulğanlıqtan mikän, plenum yomğaqları cämäğätçelekkä çığarılmıy. Jizn'' firqäse bäyräm otkrıtkaları häm ike sosqı on taratudan ğäyre batırlıq kürsätä almadı. Şulay itep, Qazanda ber genä firka dä xäzergä at dilbegäsen qulında totarlıq tügel. Bäyräm aldınnan alarnıñ härqaysı üzeneñ dönyada barlığın sizderä.

Rimzil Wäli, Qazan.

XS
SM
MD
LG