Accessibility links

Kaliforniä xoquq saqlawçıları ber-bereñä tüzemle bulırğa öyrätä.


Düşämbe könne, Amerikannıñ Kaliforniä ştatınnan kilgän okrug prokurorı, xakime häm politsiä xezmätkärläreneñ Qazanğa säfäre tämamlandı. Tatarstan başqalasında 13 yünnän başlap 15nä qädär «Işanu klimatı» digän Rusiä häm Amerikanıñ urtaq proyektı qısalarında «ışanu, tüzemlelek häm ekstremistlıqqa qarşı toru» digän fänni-ğämäli konferensiä bulıp ütte. Kaliforniä xoquq saqlaw oyışmalarınıñ Tatarstan eçke eşlär ministrlığı belän duslığı 2002 yılnıñ martınnan birle däwam itä. Respublika militsiäse xezmätläre Kaliforniägä barıp, ä andağı politsiä xezmätkärläreneñ monda kilep täcribä almaşuı 1 yıl elek uq buldı inde. Bu yulı ike yaq ta Qazanda cıelışıp, milli mäs’älä arqasında kilep çıqqan tärtip bozular turında da söyläşte.

Oyıştıruçılar fikerençä, törle millät, törle din wäkilläreneñ mänfäğätlären qänäğätländerep kenä, tatulıqqa ireşep bula. Şuña kürä älege konferensiädä ğalimnär, Tatarstanda yäşäwçe törle din ähelläre, törle milli oyışma wäkilläre dä qatnaştı. Konferensiädä bulğan häm Üzäk Aziä belgeçläre Tatarstannıñ millätara häm dinara tatulıq urnaştıru täcribäse belän dä tanıştı.

Konferensiäneñ soñğı könendä, yäğni 15 yündä, «Işanu klimatı» digän Rusiä häm Amerika programmasınıñ direktorı Pnina Levenmor, San-Fransiskonıñ okrug xakime Charlz Xayns, okrug prokurorı Linda Kli häm Kaliforniä politsiäse xezmätkärläre xökümät citäkçese urınbasarı belän oçraştı. Älege küreşüdä, qunaqlar, Qazanda ütkän konferensiä belän qänäğät qaluları häm programma qısalarına çaralarnı alğa taba da däwam itterergä teläüläre turında belderde.

«Işanu klimatı» digän programma belän xezmättäşlek itü başlanğannan soñ, Qazanda xoquq saqlaw oyışmalarınıñ dini, milli, ictimaği oyımalar belän xezmättäşlek itü üzäge açıldı. Şulay uq Qazan belgeçläre «Işanu kul’turası» digän uqu programması östendä dä eşli başladı. Anıñ eçendä möselman, yahud, xristian mädäniäten cämäğätçelekkä tanıtu da küz aldında qaralğan.

Tatarstan xökümätendäge oçraşuda, «İşanu klimatı» programması qısalarındağı çaralarnı kiläse yılda, Tatarstannıñ başqa şähärendä ütkärergä digän qarar qabul itelde.

Bikä Timerova, Qazan.

XS
SM
MD
LG