Accessibility links

Matbuğatqa yazılu tämamlana. Abunäçelär sanı kimi...


«Şähri Qazan», «Tatarstan yäşläre» gäzitläre, «Mäğrifät» atnalığı häm başqa matbuğat çaraları citäkçeläre tirajları belän maqtana almıy.

Bıyılğı kampaniä, aldağı yartı yıllıq belän çağıştırğanda, şaqtıy qırıs şartlarda ütte. Abunäçelär sanı bolay da çamalı ide, gäzitlärneñ kübese yazılu bäyäsen tağın kütärergä mäcbür buldı. Bolar xaqında «Söyembikä» jurnalı baş möxärrire Firaya Bädretdinova belän äñgämä qordıq:

«Bezneñ tirajıbız 7 meñ tiräsendä älegä. Bu ütkän yartı yıllıq belän çağıştırğanda bik zur kimü tügel. Soñğı näticä yasalmağan äle. Bez ul sannarnı, miçtä ipi peşep çıqqanı kötkän kebek, kötäbez. Ämma, ğädättä, sannar bez kötkännän barıber tübänräk bula. Bezgä bik küp xatlar kilä. Uquçılar, sezne bik yaratabız, dip yazalar. Ämma yazılu näticäläre iğlan itelgändä, bez uquçılar mäxäbbäten sizmibez. Jurnalnı şul xätle tırışıp çığarabız, ä abunäçelär barıber az. Üpkä dä belderäse kilä inde. İkençe yaqtan, bez uquçılarnıñ xälen dä añlıybız. Mäsälän, ber awılda, Saban tuyı aldınnan duñğız qarawçı ber apağa 7 aylıq xezmät xaqın birgännär – 1500 sum. Anıñ iptäşeneñ, terlek qarawçısınıñ da eş xaqın annan zurraq tügel. Bu aqçağa ul jurnalğa yazılsınmı, burıçların tüläsenme? Uqırğa teläp tä, yazılırğa mömkinlege yuq keşelärneñ, şunısı - bigräk tä qızğanıç».

Elemtä ministrlığı, 9nçe yündä sanap çığarğan berençel mäğlümatlarğa qarağanda, «Watanım Tatarstan»nıñ 16 meñ yarım tiräse , «Mädäni comğa» gäziteneñ – 5 meñ yarımğa yaqın tirajı bar . «Tatarstan yäşläre»n – 38 meñ keşe yazdırğan, annan soñ 31 meñlek tiraj belän «Yuldaş» gäzite bara. Qalın jurnallarnıñ tirajı – 2-3 meñ tiräse.

Kampaniä betügä äle berniçä kön bar. Bu waqıt eçendä abunäçelär sanı artırğa da mömkin. Yazılu kompaniäseneñ soñğı näticäläre 25 yünnän soñ bilgele bulaçaq.

Bikä Timerova, Qazan.
XS
SM
MD
LG