25-26 yün könne Qazannıñ Piramida küñel açu üzägendä tanılğan cırçı Rafail İlyasovnıñ konsertı uzaçaq. Älege kiçädä estrada köyläre genä tügel, ä tatar xalıq cırları, klassik muzıka da yañğırayaçaq. Konsertta cırçılar Zöhrä Şäräfieva, Raşat Sabirov, La Primavera Qazan kamera orkestrı qatnaşa, şulay uq anda Başqortstannan kilgän İxlas-Aysılu cır teatrı da çığış yasayaçaq.
Qazannıñ Ğäliäskär Kamal isemendäge teatrı bu könnärdä tamaşaçılarnı premyera belän şatlandıra. 23 yünnän anıñ säxnäsendä Räbit Batullanıñ Kiçer mine, änkäy spektakle bara. Bu bıyılğı sezonnıñ soñğı premyerası. 1979 yılda berençe märtäbä quyılğanda kebek ük, bu spektakl xäzer da tamaşaçılarğa bik oşadı. Äsärne Miläwşä Zakirova säxnäläştergän, anda teatrnıñ tanılğan akterları uynıy. Comğa, 27 yün könne, Äldermeştän Älmändär spektakle belän Kamal teatrı üzeneñ sezonın yabaçaq. Ä kiläçäk sezonda isä Kamal teatrınıñ yañartılğan säxnäsendä opera da tıñlarğa mömkin bulaçaq. Musa Cälil isemendäge opera häm balet teatrı üzeneñ binasında däwam itkän remont eşläre säbäple, qayber spektakl’lären Kamal teatrı binasında kürsätäçäk.
Pänceşämbe, 26 yün könne, Musa Cälil isemendäge premiäne tapşıru tantanası bulaçaq. 2003 yılnıñ lawreatların respublikanıñ Ministrlar Kabinetında täbrikliäçäklär. İsegezgä töşerep ütik, Musa Cälil premiäsenä bıyıl Mäğärif milli näşriäte citäkçese Mödärris Wäliev, cırçı Salawat Fätxetdinov, Sälät Tatar respublika yäşlär ictimaği fondı layıq buldı.
Gölnaz İlgizär
