Accessibility links

Кайнар хәбәр

Perm Sabantuyı


Küp kenä Rusiä töbäklärendä görläp Sabantuylar däwam itä. Bu şimbädä Perm ölkäse Sabantuynı Perm şähärendä zurlap ütkärä. Perm ölkäsendä 151 meñ tatar yäşi. Ä Perm şähäreneñ üzendä genä 42-43 meñ tatar yäşi. Perm ölkäseneñ tatar-başqort milli-mädäni möxtäriäte 1998 yıldan uq inde eşläp kilä. Bu möxtäriät üz eçenä cirle möxtäriätlärne ala. Alar arasında Perm şähäreneñ Tatar-başqort ictimaği üzäge, Perm şähäreneñ cirle milli möxtäriäte, Perm rayonınıñ möxtäriäte. Häm ölkäneñ könyaq rayonnarı möxtäriätläre: Suqsun, Oktäberskiy, Çernuşki, Uinski, Kungur rayonnarı. Çaykovski, Kungur – şähärläre möxtäriätläre.

Tönyaq rayonnarnıñ Solikamsk, Gubaxa, Berezniki, Dobryanka, Kizel şähärläre möxtäriätläre kerä.

Bıltır Perm ölkäse Sabantuyına Qazannan Zilä Wälieva citäkçelegendäge delegatsiä barğan ide. Bıyıl bu Sabantuyğa Çallı şähäre Xakimiäte başlığı Xämädiev Raşit äfände häm ğädättän tış xällär ministrlığı urınbasarı Zahit Ziganşin äfändelär baralar. Bügenge şuşı Perm ölkäsendäge uzası Sabantuy turında, kiläçäk eşlär, problemalar turında “Azatlıq” radiosına Federal' milli-mädäni möxtäriätneñ cawaplı särkätibe Färit Urazaev söyläde.

Perm ölkäse milli-mädäni möxtäriätneñ yaña räise itep saylanğan, awıl xucalığı ministrlığı urınbasarı Gozairov Xälil äfände belän bağlanışlarnı tiränäytep, Perm ölkäse MMMneñ Sovetı belän oçraşıp, kiläçäkkä eşlär planlaştırıp qaytunı küz aldında totabız, dide.

Äye, Perm ölkäsendä çınlap ta tatar problemaları çişelep tora. Barda rayonı millättäşlärebezneñ Qazandağı “Yaqtaşlar” klubı eşe turında bez sezgä söylägän idek inde. Tinçurin isemendäge teatrnıñ tanılğan rejisserı Räşit Zahidullin da çığışı belän Perm ölkäsennän ikänen millättäşlärebez belä. Perm ölkäsendä tatar telendäge “Xalıq çişmäse” gäzite yañadan çığa başlağan. Tatarstan radiosın tıñlawçılarğa mömkinçeleklär tudırıla. Ämma, Färit Urazaev äytüençä, ekonomik bağlanışlarnı tieşle däräcägä citkererlek itep eşlise bar äle. Häm Federal' Sabantuyların Perm ölkäsendä dä uzdırırğa uylağan plannar tormışqa aşır, dip isäpli ul.

Şunı da äytep ütäse kilä: şuşı uq könnärdä, yäğni 28 iyündä Mäskäw ölkäseneñ dä Sabantuyı Puşkin şähärendä uzaçaq. Anıñ oyıştıruçısı İlşat Säfärğaliev citäkçelegendäge MMM. Mäskäw şähäreneñ Sabantuyı 5 iyüldä Bitsevo parkında uzaçaq.

Mälikä Basır. Qazan
XS
SM
MD
LG