Accessibility links

Prezident Bush amerikan ğäskärläre Ğiraqtan kitmiäçäk dip belderä


Ğiraqta amerikan xärbiläreneñ daimi yuğaltular kiçerep toruwı Quşma Ştatlarnıñ üzendä, anda haman ğäskär totu kiräkme digän sorawlar uyata, xörmätle tıñlawçılar. Här ülem amerikan cämäğätçelegendä Waşingtonnıñ Ğiraq säyäsäten yaqlawnı kimetä diärgä bula. Prezident George Bush bu uñaydan şuşı borçulı täräqqiatne cäyeldermäw yulların ezlärgä tırışa.

Çärşämbe amerikannar öçen yaña qayğılı xäbär alıp kilde - sişämbedä Ğiraqnıñ ike urınında qorallı höcümgä duçar bulğan häm törle cäräxätlär alğan 6 ğäskärineñ berse xärbi xastaxanädä ülde, şulay itep, prezident Bush Ğiraqta zur bäreleşlär bette dip beldergännän soñ anda hälak bulğan amerikannar sanı 23-kä citte. Quşma Ştatlarnıñ Ğiraqtağı köçlärenä höcümnär soñğı aralarda yışraq yasala başladı, bu beryaqtan, alarda ärnü, borçılu, xätta üç alu xislären uyatsa, ikençe yaqtan, amerikan yağınıñ cawap qaytaruwı, ilneñ ğadi xalqı arasında da qorbannar sanın arttıra. Şul uq sişämbedä alar Bagdadta 4 keşene atıp üterde, moñardan tış, Fälluca şähärendäge ber mäçettä bulğan şartlaw näticäsendä kimendä 5 ğiraqlı hälak buldı. Cirle xalıq şartlaw öçen şunda uq amerikannarnı ğäyepläp çıqtı, alar mäçetkä ut açtı dip belderde, Quşma Ştatlar isä moña bina eçendä şartlatqıç totu säbäp buldı dip añlattı. Bolar barısı da Ğiraq eçendäge kierenkelekne häm amerikan wä britannarğa yasalğan höcümnärne arttıruğa ğına kiterä. Bu isä üz çiratında inde Quşma Ştatlar cämäğätçelegendä, Ğiraqta iminlek urnaştıru mömkinlegenä ışanunı kimetep, anda ğäskärlär totu ğomumän kiräkme soñ digän borçulı sorawlar uyata. Quşma Ştatlarda ütkärelgän soñğı fiker beleşü näticäläre şunı kürsätä, Bushnıñ Ğiraq säyäsäten yaqlaw äkrenläp kimi bara. Elegräk amerikan cämäğätçelege, Aq yortnıñ Ğiraqtağı küpläp yuq itü qoralları turındağı belderülärenä nigezdä ışanıp, anda ğäskärilärne cibärüne dä yaqlıy ide. Prezident Bushnıñ ike ay elek "Abraham Lincoln" oçqıç korabına barıp tantanalı räweştä, Ğiraqta inde zur suğışlar bette dip iğlan itüwen dä Quşma Ştatlarda ömet belän qarşı aldılar. Ul çaqta prezidentnıñ şuşı fikere belän bar amerikannarnıñ 76 protsentı kileşsä, xäzer bu san 56-ğa töşte dip xäbär itä çärşämbe sanında "Financial Times" basması. Ul CNN, USA Today häm Gallup ütkärgän soñğı fiker beleşü näticälärenä tayana. Bu şartlarda ildä, Ğiraqtan amerikan köçlären kire qaytaruğa öndäwlärneñ artuwı ğäcäp tügel. Sişämbedä prezident Bush cämäğätçelekneñ şuşı borçuların tınıçlandırırğa tırıştı. Waşingtonda ul, Quşma Ştatlarnı Ğiraqtan kitügä berni dä mäcbür itä almıy, Amerika Ğiraqqa bulışu eşennän waz kiçmiäçäk dip belderde.

NC070159

"Ğiraqnı torğızuğa qomaçawlarğa teläwçelär bezneñ berektäşlekkä genä tügel, bar Ğiraq xalqına höcümnär yasıy. Häm bez Ğiraq xalqı belän, anıñ üzenä ömetle kiläçäk qoruwı waqıtında bergä bulaçaqbız" di Quşma Ştatlar prezidentı George Bush. Soñğı höcümnär öçen cawaplılıqnı ul, elek Ğiraqta xakim itkän Baath partiäse qaldıqlarına häm Saddamnı yaqlarğa kilgän çit il suğışçılarına yökläde. Läkin Bush, bu törkemnär bezne, ireklek urnaşqançı Ğiraqtan kitügä etärmäyäçäk dip tä östäde. Anı Quşma Ştatlarnıñ Bagdadtağı waqıtlı xakime Paul Bremer dä xuplap tora, ul sişämbe könne, Ğiraqtağı şartlar könnän-kön yaxşıruwın däwam itä digän süzlär äytte.

Kärim Kamal, Praga.
XS
SM
MD
LG