Şimbä, 5 yül könne, Qazandağı Zareç’ye cäyge sälämätländerü lagerında Rusiä töbäklärendä yäşäwçe tatar balaları öçen Duslıq smenası eşli başlıy. Älege lagernı Tatarstannıñ Mäğärif ministrlığı oyıştırğan. Bu cäyne ul inde 6 märtäbä ütkärelä. Ministrlıq wäkile süzlärenä qarağanda, ul rus möxitendä yäşäwçe tatar balaları öçen ütkärelä. Monda alar tuğan tellären kamilläşterälär, tatar mädäniäte, ğöref-ğädätläre belän tanışalar. Monıñ öçen alarğa lagerda bar mömkinleklär dä tudırılğan. Balalarnı bik qızıqlı, bay programma kötä – Qazan, Tatarstan belän tanışu, qızıqlı şäxeslär belän oçraşular, küpsanlı ekskursiälär häm mawıqtırğıç bäygelär. 5 yünnän 22nä qädär Duslıqta Rusiäneñ küp kenä töbäklärennän kilgän 150 bala yal itäçäk.
Yäkşämbe, 6 yün köne isä, 14 tatar yäşläre könnäre başlanıp kitäçäk. İnde xäbär itkänebezçä, bıyıl alar Boris Polevoy teploxodında uzaçaq. Anda qatnaşuçılar öçen dä oyıştıruçılar bik bay programma äzerlägännär. Bıyılğı tatar yäşläre könnärendä Rusiä töbäklärennän häm BDB illärennän 100dän artıq yäş millättäşlärebez qatnaşır dip kötelä.
Respublikanıñ milli muzeyı Mäskäwdä ütkän İntermuzey-2003 V Bötenrusiä muzeylar festivalendä qatnaşıp qayttı. Alar anda Milli üseş mäs’älälären muzey çaraları belän icadi çağıldıru diplomına häm İntermuzey-2003 festivaleneñ medalenä layıq bulğannar. Milli muzey turında tağın ber qızıqlı xäbär. Tizdän muzeynıñ İnternet säxifäsen tatarça da uqıp bulaçaq. Älege eşne cayğa salu öçen federal’ byudjettan 100 meñ sum külämendä aqça bülenep birelergä tieş.Gölnaz İlgizär, Qazan
