Accessibility links

Кайнар хәбәр

Kön waqiğaları, mädäni yañalıqlar...


Ä xäzer xörmätle tıñlawçılarıbız könneñ başqa waqiğaları häm yañalıqlarına qısqaça küzätü.

Bıyılğı cäyneñ kürsätkän tamaşaları turında söyläp kiläbez. Jomgaga qarşı töndä Qazan häm qayber rayonnarda yäşenle yañğırlar uzdı. Ğädättän tış xällär ministrlığı Mamadış rayonında yañğır suları ber awılda buanı yuıp alıp kitkän dip xäbär itä. 3 şäxsi xucalıqnı su basqan. Qorbannar turında xäbär itelmi. Tatarstan Diniä näzaräte räise möfti Ğosman İsxaqi mäğlümat çaralarına: “Qazandağı Rusiä islam universitetı federal' üzäktän finanslana başlanaçaq“ digän belderü yasadı. Älegä bu yärdäm berniçä million rubl' külämendä bulır dip farazlana. Moñınça universitet törle xäyriä aqçalarına yäşäde. Monnan ber yıl çaması elek Qazandağı Rusiä islam universitetında Rusiä iminlek Şurası särqatibe Vladimir Ruşaylo bulıp kitkän ide. Ul universitet eşçänlegenä uñay bäya birde häm matdi yärdäm wäğdä itkän ide. İntertat.ru dini mäğärifkä qağılışlı tağın ber söyeneçle yañalıq xäbär itä. Qazan möxtäsibäte - möselmannarnıñ dini idäräse qarşında Qazan İslam kölliäte açıla. Kölliättä uqu dürt yıl bulaçaq. Anı tämamlawçılar uquların Rusiä İslam universitetında däwam itä ala dielä xäbärdä.

Comğa irtäse Qazanda şulay uq küñelle çara belän başlanıp kitte. Qazan yılğa portında tatar-başqort zıyalıları töyelgän köymäne qarşıladılar.

Bötentatar ictimaği üzägendäge xällär.

Tatar ictimaği üzäge “Ğädellek häm Rusiä alğarışı partiäseneñ” Tatarstan töbäk bülegen oyıştıru eşläre belän mäşğül. Xalıqqa taratılğan möräcäğättä älege partiäneñ elek İslam partiäse buluı añlatıla. Küptän tügel Rusiä Däwlät Duması qabul itkän “Partiälär turındağı qanunnı“ ütäw nisbätennän İslam partiäse isemen häm cisemen üzgärtä. 7 iyüldä Bötentatar ictimaği üzäge cıyılışında “Ğädellelek häm Rusiä alğarışı” firqäseneñ töbäk bülegen buldıru täqdime xuplanğan. Xäzer yustitsiä ministrlıgında terkäw eşläre alıp barabız dide “Azatlıq” radiosına İctimaği üzäk räise Räşit Yağfärov. Ul şulay uq kürenekle cämäğät eşleklese Zäki Zäynullinnı 70 yäş tulu uñayınnan qotlawları turında da söyläde. Qotlawda Bötentatar ictimaği üzägendäge köräştäşläregez tatar xalqınıñ milli xäräkätendä ayırım ber kürenekle urın totuığıznı häm bu yulda küp-küp igelekle ğämälläregezne iqrar itep yäşibez digän yullar bar. Zäki Zäynullinğa 10 iyündä 70 yäş tuldı.

Axırda bu xäbär tuplanıp betkän minutlarda kilgän mäğlümat. Cırçı Salawat Fätxetdinov comğa kön töştän soñğa bilgelängän press-konferensiäsenä soñğa qalıp kilde. Ul avtomobil' uzışlarındağı köräştäşe İlham Räxmätullinnıñ änise cenazasında qatnaşıp yörgän. Salawat matbuğat oçraşuın cäygä konsertları başlanuı uñayınnan ütkärde. 15 yıl sezneñ belän digän konsertlar 11 iyüldä Ğäliäskär Qamal teatrında başlana.

Yunıs Ätnäle.
XS
SM
MD
LG