Salawat Fätxetdinov: 15 yıl sezneñ belän

11 avgustta Kamal teatrında tanılğan estrada cırçısı Salawat Fätxetdinovnıñ çirattağı konsert programması kürsätelä başlıy. Bıyıl ul 15 tapqır Qamal säxnäsenä üzeneñ 15 yıl sezneñ belän dip isemlängän konsert programması belän icadi bäygegä çığa. Comğa könne uzğan jurnalistlar belän oçraşu da näq menä şuşı uñaydan oyıştırılğan ide. Salawat oçraşuğa soñlap kilde. Çönki ul dustı häm avtomobil buyınça Rusiä çempionı İlham Raxmatullinnıñ änise Räise xanımnı soñğı yulğa ozatu öçen Mendeleev rayonına barıp qaytqan. Ber kön eçendä cenazada da, estrada turındağı bäyrämçä söyläşüdä dä qatnaşu Salawatqa ciñel bulmağandır, älbättä. Şulay da ul oçraşuğa kilgän jurnalistlarğa ğädättägeçä ixlas fikerlären äytte. Äytergä kiräk, oçraşuğa kilgän jurnalistlar arasında rus telendä eşläwçe matbuğat çaraları wäkilläre kübräk ide. Ällä şuñadır, Salawat sorawlarğa ber uq waqıtta rusça da, tatarça da cawap birde.

Üzeneñ avgust gastrol’lären 15 tapqır ütkärgändä dä, Salawat Qamal teatrına xıyänät itmi. Piramida zalı niqädär matur bulsa da, Salawatnı tıñlarğa yörüçe apalar häm abıylar näq Qamal teatrına künekkän ikän. Teatr direktorı Şamil Zakirov belän Salawatnıñ icadi berläşüe dä üzgärä torğan tügel. Bıyılğı konsert programması sanatoriy häm kurort tormışı turında kölkele küreneşlär belän bäyle bulaçaq. Jurnalistlarnıñ yäş talantlarnı Salawat niçek itep üsterä häm üz konsertlarında qatnaştıra digän sorawına, cırçı yaña isemnärneñ siräk yañğırawı turında äytte. Salawat konsertında elekke yıllarda berençe tapqır tamaşaçığa kürengän Mälikä, İldar Xäkimov bu yulı anıñ programmasında qatnaşmıy. Mälikäneñ talantın yuğarı bäyäläsä dä, Salawat anıñ möstäqil programma belän tamaşaçığa çığuına ömetlänmi.

Oçraşu waqıtında Salawat xit-paradlar temasına da tuqtaldı. Anıñ fikerençä, cırçınıñ alarda ciñüe aldan uq bilgele. Şuña kürä, xäzer ul bötenläy estrada xit-paradlarında qatnaşmasqa qarar itkän.

Min ul xit-paradlarda bütän qatnaşmıym, kiräkmi alar miña. Berär niçek konkurstan tış bulsa ğına. Kemder miña sin berençe, sin qırıq berençe dip bäyälär birmäsen

Şulay itep, Salawat fikerençä, anıñ niçänçe urında ikänen xit-paradlar tügel, ä ul üze häm tıñlawçılar xäl itärgä tieş. Tizdän alarğa mondıy mömkinçelek inde 15 märtäbä tuaçaq.

Gölnaz İlgizär, Qazan