Accessibility links

Кайнар хәбәр

Tatarstannan soñğı xäbärlär...


Tatarstan prezidentı Mintimer Şäymiev Ukrainağa kilep, şuşı ilneñ citäkçese Leonid Quçma belän oçraştı. Respublika başlığınıñ älege säyäxäte näticäsendä Ukrtatnafta neft' eşkärtü zavodınıñ aksiäläre Tatarstan qulına küçärgä tieş.

Däwlät Sovetı deputatları sentäber ayına qädär cıyılmayaçak. Yazğı sessiäneñ soñğı utırışı waqıtında, pänceşämbe könne, Rusiä Konstitutsion mäxkämäse Tatarstannıñ däwlät eşläre buyınça mäs’älälärne prokuror ğomumi häm arbitraj mäxkämälärgä möräcäğät itä alamı, yuqmı digän sorawğa açıqlıq kertte. Däwlät Sovetınıñ 49 deputatı başqa xakimiättä eşläwe döres dip tabılmasa da, respublika qanunnarın çemetkäläw däwam itsä dä, barıber respublika parlamentı üze niqädär eşlärgä teli, şul waqıtqa qädär taralmayaçaq. Xäzer inde Rusiä Däwlät Dumasına, Rusiä prezidentlığına saylaw kampaniäse başlanırğa tora. Şul waqıtta säyäsi, xoquqi uyınnar zurıraq däräcädä baraçaq.

Uñ köçlär partiäseneñ räistäşe, Duma räise urınbasarı İrina Xakamada belän Qazanda bik cılı oçraşular ütte. Yäkşämbe könne böten rusiä belän bergä Metallurgiä könen bilgeläde. Xökümät pedagogik uku yortların tämamlap, mäktäplärgä barğan 3400 yäş uqıtuçınıñ eş xaqın 30 protsentqa arttırdı.

Parlament kanikulğa çıqsa da, däwlät, xucalıq eşendä yal itü, kanikullar bulmıydır ul. Cäy könnäre mäşäqätle häm macaralı. Soñğı ay yarım eçendä genä dä Tatarstanda 37 keşe suğa batıp ülgän. Distälärçä keşe, şul isäptän, xatın-qızlar, balalar da, su töbenä töşep kitä yazıp, köç-xäl belän genä qotqarılğannar. Uzğan atnada Yäşel Üzän rayonında ike ir keşe yaña çabılğan peçänne köymägä töyäp, qaytırğa çıqqannar. Susıl ülän awırlığınnan köymä çayqalıp, yılğa awın kertä başlağan. Häm menä şul peçänle su arbası yılğa töbenä töşep kitkän. Ägär dä, yök östendäge ike ir keşene Yäşel Üzän qotqaruçılar kürep almasalar, eşlär xört bulır ide.

Säyäsi tormışta da näq menä şulay inde. Xätta qaynar cäy könnärendä dä ber batasıñ da, ber qalqasıñ. Ber ğasır elek bulğan waqiğalar da törleçä bäyälänä. Perestroyka başında häm aña qädär ütkän 60-70 yıl däwamında böyek tatar yazuçısı häm milli liderı Ğayaz İsxaqinı belüçelär bik az bulğandır. Xäzer bu zatlı häm fidaqär şäxes aqrınlap milli tormışqa qayta. Uzğan şimbädä Çistay rayonınıñ Yawşirmä awılında İsxaqi uquları buldı.

Ğayaz İsxaqi millätkä, tuğan ilenä qayta. Läkin bu qaytu härkemneñ İsxaqi icatın, anıñ säyäsi qaraşların añlaw belän bäyle. Qamal teatrı häm mädäniät minitsrı oyıştırğan bu çara, şuşı añlawğa yärdäm itärgä tieş. Çönki haman da äle İsxaqinı belü häm añlaw däräcäse Pavlik Morozov häm Pavel Korçagin turındağı mäğlümattan qalışa.

Qazan yanında çit töbäklärdän kilgän tatar balaları öçen lager' oyıştırılğan ide. Düşämbe könne ul üz eşen tämamlıy.

Axırda – sport tormışı. Avtomobil' yarışları buyınça Rusiä çempionatınıñ 7nçe etabı yäkşämbe könne Qazanda ütte. Xäzer böten rusiädä Tatarstan sportçıları belän köç sınaşuçılar siräk oçrıy. Härxäldä, 7nçe etapta ciñüçelärneñ isemnäre şundıy: Ayrat Şäymiev, Röstäm Miñnexanov, Radik Şäymiev. Premyer-ministr Röstäm Miñnexanov şuşı şaqtıy qurqınıç häm ostalıq taläp itüçe yarışlarda qatnaşsa da, xökümät dilbegäsen, finans ağımnarnı ber sekundqa da quldan ıçqındırmıy dilär. Näticälären köz köne häm yıl axırında kürerbez.

Şunıñ belän Tatarstan xäbärläre tämam. Alarnı Azatlıq radiosınıñ Qazan byurosı äzerläde. Tapşırunı Rimzil Wäli alıp bardı.
XS
SM
MD
LG