Rusiä tışqı äşlär ministrı urınbasarı Aleksandr Losükov Tönyaq Koreada atom qoralı bulu ixtimalı belän bäyle räweştä, Rusiä Yıraq Könçığışta siwil saqlanunıñ ni xäldä buluın tikşeräçäk dip belderde. Anıñ süzlärenä qarağanda, Korea yarımutrawında "äkrenläp naçarlana barğan wazgiättä" bu ğädäti ber çara bulıp tora. Quşma Ştatlar Tönyaq Korea atom bombası yasıy, anıñ inde xäzer ük ber ike atom bombası bar dip täqrarlıy. Pxenyan bu ğäyepläwlärne kire qağa.
