Tarmaqnıñ awır xäle turında söylägändä ministr Marat Xösnullin burıçlar mäs’äläsenä basım yasadı. Toraq häm kommunal xucalıq oyışmaları kürsätkän xezmätlär öçen başlıça xalıq häm byudjet oyışmaları waqıtında tülämi. Burıçlarnıñ küläme 750 million sumğa citkän inde. Açqalarnı qaytarmağan oçraqta, ministr qatğıy çaralar kürergä wäğdä itä. Xalıq fatir xaqların tülämi, digän ğäyepläwlär yañğırasa da, bu tüläwlärne qabul itä torğan bank, poçta bülekçälärendä çiratlar küzätelä. Qazannıñ Aviatözeleş rayonı poçta bülekçäsendä toraq öçen aylıq tüläwlärne qaplarğa dip kilgän berniçä keşe, «Azatlıq» radiosı xäbärçesenä, tülängän oçraqta da kommunal xezmätlärneñ burıçlar bilgeläwne, döres isäplämäwne belderde. Şul uq waqıtta, äñgämäläşkän keşelär arasında, toraq-kommunal reformağa mönäsäbätneñ az ğına bulsa da yaxşı yaqqa üzgärüe sizelde.
Toraq-kommunal xucalıq häm tözeleş ministrı, üzeneñ xisabında şulay uq, bu ölkägä keçe biznes wäkilläreneñ ütep kerüen uñay küreneş dip bäyäläde. Mäsälän respublikada böten toraq fondınıñ 37% - şäxsi oyışmalar qulında. Ämma monda ber problema bar. Küp oçraqlarda köndäşlektän qurqıp, däwlät oyışmaları häm cirle xakimiätlär eşmäkärlärne kommunal’ xezmätlär kürsätü bazarınnan qısrıqlap çığarırğa tırışa ikän. Ä keçe biznes wäkillären bu ölkä bik qızıqsındıra, mäsälän, Qazanda toraq fondı belän idärä itügä iğlan itelgän bäygedä 200 şirkät qatnaşırğa teläk beldergän. Ä Tübän Kama häm Norlatnıñ toraq fondı tulısı belän şäxsi oyışmalar qaramağına küçkän inde.Bikä Timerova, Qazan.
