«Tatarstan - yaña ğasır» xäräkäte saylawlarda «Berdäm Rusiä» firqäsen yaqlayaçaq...

«Tatarstan - yaña ğasır» xäräkäteneñ 16 meñnän artıq tarafdarına dekaberdäge saylawlarda qatnaşırğa telägän säyäsi firqälärneñ kübese ömet bağlap tora ide. Ämma, aldan farazlanğança, xäräkät citäkçese Färit Möxämmätşin räsmi terkälgän ike distä säyäsi oyışmalar isemlegennän «Berdäm Rusiä» firqäsen genä atadı.

Pänceşämbe, 24nçe yüldä xäräkätneñ säyäsi şura utırışı buldı häm anda kerüçe şura äğzäläre sentäberdä xäräkätneñ qorıltayın cıyarğa, digän qarar qabul itte. Qorıltaynıñ kön tärtibenä: «Rusiä Dumasına saylawlar waqıtında «Tatarstan- yaña ğasır» xäräkäteneñ säyäsi qaraşları...» digän mäs’älä quyılaçaq.

«Yaña ğasır»lılar kemne yaqlar ?» digän häm küplärne qızıqsındıra torğan sorawğa, Färit Möxämmätşin, qorıltay delegatlarına yünälgän möräcäğät belän tanıştırğanda cawap birde. Anda äytelgänçä, xäräkät «Berdäm Rusiä» firqäseneñ räistäşe Mintimer Şäymievnıñ säyäsi qaraşların yaqlıy häm «Berdäm Rusiä» firqäse belän bergä saylawlarda qatnaşırğa äzer. Ütkän atnada Qazanğa «Uñ köçlär berlege» wäkile İrina Xakamada Färit Möxämmätşin belän oçraşqanda, «Tatarstan- yaña ğasır» xäräkäte uñ köçlärgä dä öleş çığarır dip farazlawçılar buldı. Saylawlarda niçä firqäne yaqlarğa cıyınuı xaqında «Yaña ğasır» xäräkäte citäkçese tögäl cawap birmäde. Ul «Berdäm Rusiä» belän bergä eşlärgä cıyınuı xaqında äytte, ämma säyäsi qaraşları turı kilgän ayırım nämzätlärne yaqlarğa qarşı bulmawın da belderde

. Sentäberdä «Tatarstan-yaña ğasır»nıñ inde 5nçe qorıltayı bulaçaq. Respublikadan barlığı 500läp wäkil çaqırırğa uylıylar. İñ zur 70 keşelek wäkilçelek Qazannan saylanırğa tieş bula, ä xäräkätneñ bülekçäläre bulğan rayon häm şähärlärdän 10-lap keşe genä çaqırıla.

Xäräkät üzenä yaña tarafdarlarnı cälep itü mäs’äläse aldında tora. Anıñ öçen ul, közge säyäsi sezonda, üzeneñ aktivlığın arttırırğa uylıy. Mäsälän, citäkçelek «Uñışqa ireşkän yäşlär» bäygesen başlap cibärüläre turında iğlan itte. Anda yäşlär oyışmaları wäkilläre qatnaşır dip kötelä. Şunıñ belän bergä, bıyıldan başlap, bu xäräkät «Tatarstan yäşläre» digän tatar cırı festivalen ğämälgä quyuçılar isemlegenä keräçäk. Anda mäsälän ul bäygeneñ «iñ yäş tatar cırçısı», «iñ yıraq töbäktän kilüçe» häm «tatar estrada cırın iñ yaxşı başqaruçı» digän öleşlärendä ciñüçelärgä büläk birergä uylap tora. Bu äle yıraqtağı plannar bulsa, respublika rayonnarında häm şähärlärendä qorıltayğa äzerlek eşläre yaqın könnärdä başlanıp kitäçäk.

Bikä Timerova, Qazan.