«Radioteleset» kompaniäseneñ yaña citäkçelege, «Qazan» radio-studiäseneñ eşen yañartu turında qarar qabul itte. Bu mäğlümat çarasınıñ baş möxärrire Tatyana Pivovarova süzlärençä, tulı qüätle efir 1nçe avgusttan başlanaçaq. Älegä, texnik xezmätlär, signalnı sınap qaraw öçen genä tapşıralar. «Qazan» radiosı çıbıqlı radio bulıp qala, ämma citäkçelekneñ äytüenä qarağanda, kiläçäktä «Qazan» studiäse äzerlägän 1 säğätlek programma FM dulqınnarında da tapşırılırğa mömkin. «Qazan» studiäse üzeneñ tapşırularnıñ eçtälegen üzgärtmäyäçäk. Yabılğanğa qädär eşlägän kebek uq, ul şähär tormışı, faydalı kiñäşlär, qızıqlı keşelär belän oçraşular täqdim itärgä uylıy. Ämma, «Qazan» studiäseneñ tatar redaksiäse torğızu turında süz alıp barmıy.
Monıñ säbäpläre xaqında «Qazan» studiäseneñ baş möxärrire Tatyana Pivovarova bolay dide : « Bälkem kiläçäktä, ximayaçılar häm fidaqärlär tabılsa, tatar redaksiäse açılır da. Älegä rus redaksiäsen torğızu turında süz bara. Bezneñ ğämälgä quyuçı «Radioteleset» kompaniäseneñ texnik bazası, radio cihazları saqlansa da, kadrlar mäs’äläsendä qıyınlıq bar. Şuña min tatar törkeme turında tögäl genä cawap birä almıym. Ämma, minemçä, «Tatarstan» tele-radiokompaniäse bu eşne uñışlı başqarıp kilä häm milli tellärdäge tapşırularnıñ sanı citärlek».
Tatyana Pivovarova süzlärençä, radionıñ tıñlawçıları şaqtıy bulırğa mömkin. Çıbıqlı radioalğıç barlığı 200 meñgä yağın urında eşläp kilä. Aş bülmälärendäge häm sänäğät şirkätlärendäge elekke radioalğıçlar yanına tıñlawçılarnı cälep itü - parlament saylawları aldınnan bik möhim mäs’älä bulıp tora. Saylaw aldı kompaniäsendä qatnaşırğa cıyınuın «Qazan» studiäseneñ baş möxärrire Tatyana Pivavarova da inqär itmäde. Läkin radionıñ säyäsi qiblasın älegä açıqlarğa telämäde.Bikä Timerova, Qazan.
