Accessibility links

Кайнар хәбәр

Färit Musin: «Federal üzäk büdjetara mönäsäbätlärne caylaw mäsäläseneñ möhimlegen añlıy başladı»


31 yüldä Qazanda federativ häm cirle üzidarä reformalarına bağışlanğan ike könlek uqular tämamlandı. Rusiä finans ministrlığınnan kilgän büdjet säyäsäte bülege citäkçe Aleksey Lavrov, üzeneñ çığışında Rusiä prezidentınıñ 2004 yılğa dip isäplängän büdjet yullamasına işärä yasadı. Vladimir Putin kiläse yıl planına büdjetara mönäsäbätlär reformasınıñ däwam itterelüen kertä ikän.

Tatarstan öçen büdjetara mönäsäbätlär yaña äyber tügel. Respublika häm Federal Üzäk belän tözelgän şartnamä qısalarında, keremnärne Mäskäw belän Qazan arasında bülü xaqında kileşülär inde 1994 yılda uq eşlängän ide. Annan soñ salımnar bülü tärtibe federal üzäkneñ öleşe artuğa häm Tatarstannıqı kimügä taba berniçä tapqır üzgärtelde. Xäzer Tatarstan salımnarnı başqa Rusiä ölkäläre kebek tüli, respublika moña qädär üzenä qaldırğan aqçalar, federal programmalar räweşendä kire respublikağa qayta.

Xäzer Mäskäwdä dä büdjetara mönäsäbätlärne cayğa salu yulları xaqında uylılar. Şulay itep, Qazanda Rusiäneñ finans ministrlığı, Respublika xökümäte, İdel buyı häm Ural federal okrugı qatnaşlığında ike könlek seminar ütkärelde. Anıñ eşendä Rusiä federatsiäse şurasınıñ büdjet komitetı citäkçese Yevgeniy Buşmin da qatnaştı. Şulay uq bu çarada İdel buyı häm Ural federal okruglarına kerüçe töbäkläreneñ finans oyışmaları citäkçeläre dä buldı. Tatarstan isemennän seminarda çığış yasağan Tatarstan xalıq deputatı Färit Musin, «Azatlıq» radiosı xäbärçesenä birgän intervyusında: «İñ möhime, federal üzäk häm başqa Rusiä töbäkläre dä büdjetara mönäsäbätlärne caylaw mäs’äläseneñ möhimlegen añlıy başladı», dide.

Kiläse yıldan başlap satudan alına torğan salımnıñ beterelüe xaqındağı xäbär Tatarstan häm başqa 88 Rusiä subyektına şatlıq kitermäde. Çönki bu salım cirle büdjetqa kitä ide. Dimäk büdjetnıñ kerem öleşe dä kimiäçäk. Yuğaltaçaq keremnärne qaytaru öçen, tabıştan alına torğan salımnıñ regionğa qaldıra torğan öleşen 75% -tän 80%-gä qädär arttıru täqdim itelä. Ämma, belgeçlär fikerençä, bu da mäsäläne xäl itmäskä mömkin. Seminarda qaralğan tağın ber tema: Rusiädä büdjet häm salım säyäsäteneñ kiläçäk yünäleşläre. Mäsälän, Rusiä xakimiätläre kiläçäktä büdjet aqçaların konkret eş öçen grant räweşendä birergä täqdim itä. Şulay uq büdjet oyışmaların üzgärtep qoru, büdjet açqalarınıñ niçek sarıf itelüen kontrol itü, Rusiä töbäklärenä häm cirle üzidarä oyışmalarına kiñräk iqtisadıy möstäqillek birü küz aldında totıla.

Bikä Timerova, Qazan
XS
SM
MD
LG