Accessibility links

Кайнар хәбәр

Qazandağı xikmätle xällär turında


Qazan hawa mäydanında şundıy xikmätle xäl buldı. Tamojnya xezmätkärläre bik zur uyaulıq kürsätep, zakonsız 78 tutıy qoş totqarlağannar. Tutıy qız tügel, ä tutıy qoş, yäğni popugay. Bu qoşlar döres itep deklaratsiägä kertelmägän bulğan. Şuña kürä tutıy qoşlar Qazan zooparkına cibärelgän. Alarnı kiterüçe çit il keşese aqçasınnan qolaq qaqqan, ämma tutıy qoşlar barıber qazanlılarnı söyenderä. Milli tereleş ul mäktäptän, ğilemnän başlana. Bu atnada radionıñ Qazan byurosına kürşe respublikadan qunaqlar kilde. Tatar telen uqıtu öçen räsemle tablitsa tabarğa yärdäm sorıylar, rus mäktäbendä tatar tele uqıtu däreslege, şulay uq uqıtu programmaları. Kittek kibetkä. Öç ğözerneñ bersen dä ütäp bulmadı. Bıltır da şulay ide. Bıyıl da şul uq xäl. Şul uqıtu programmaları, däresleklär bulmağaç, meñlägän tatar klasslarında niçek uqıtalar ikän digän soraw tua. Ällä uqıtqan bulıp qına qılanalarmı. Däreslek, programma tözüçelär dä forma öçen genä qılanmıydır bit? Şuşı könnärdä Tatarstan mäğärif ministrı iyül başında çığarılğan färman köçennän çığarıldı. Çönki bu prikaznı äzerläwçe çinovniklar mäğärifkä digän çığımnarnı ekonomiäläü öçen tatar klassların artıq ürçetmäwne kiräk dip tapqannar. Ägär dä ber sıynıf 25 tän kimräk bala cıyılsa, yaña klass açmasqa digän taläp tä quyılğan bulğan. Tatar gimnaziälären dä bik üsendermäw turında qayğırtqannar ikän prikaz avtorları. Äle xata tözätelgän, milli üseşkä zıyanlı färman köçennän çığarılğan. Mäğärif ministrı Faris Xarisov andıy mäkerle färman äzerläwçelärneñ eşçänlegen tiränräk öyräner dip ışanası kilä. Bu atnada “İdel” yäşlär lagerında Tatarstannıñ yäş ğalimnäre, aspirantları yal ittelär. Aralarında tatarlar küpçelekne täşkil itä. Bezneñ öçen şunısı qızıq. Älege çara akmeologik künegülär öçen oyıştırılğan ikän. Zamança psixologik treninglar, aralaşu öçen “İdel” yarındağı naratlı häm altın qomlı matur urınğa cıyılu bik äybät. Bolay çittän qarağanda, İdeldä su kerü, irtänge aş, töşke häm kiçke aşqa yörü iğtibarnı cälep itä. Qısqası, akmeologiä Tatarstan häm tatar yäşläre öçen bik faydalı närsä. Äytergä kiräk, monı oyıştıruı yäşlär ministrlığı soñğı waqıtta bik küp qızıqlı çaralar ütkärä. Küptän tügel Tatar yäşläre könnäre “Борис Полевой” köymäsendä ütte. Yaxşı oyıştırılğan ide ul, küñelle häm faydalı buldı. Ni qızğanıç, utızlap töbäktän kilgän tatar yäşläre arasında Qazan yäşläre küzgä çalınmadı. “İdel” lagerında bu könnärdä cıyılğan akmeolog yegetlär häm qızlar citmägän ikän “Борис Полевой” köymäsendä. Bu comğada Qazanda matur ber ğädäti tuy buldı. Ğädäti digäne üz millätebez balalarınıñ quşılıp, ğailä qoruı. Yuğisä bit, mäxäbbät digän närsä teläsä nindi millät qızına yäki yegetenä bäyläp quyğaç, millätara tuylar ütkärergä turı kilä. Kiäw çit ildän tügel, ul ataqlı artist Rawil Şäräfineñ ulı Wil. Elegräk ul xoreografiä uçilişçesın tämamladı. Annarı xoquq fakul'tetın tämamlap, Qazan xakimiätendä xoquq belgeçe bulıp eşli. Liliä dä bik tärbiäle häm belemle. Anıñ änise Nelli xanım Tatarstan milli bankı räise urınbasarı. Sänğät, xoquq, finans belgeçläre qatnaşlığında tözelgän tatar ğailäse 21 ğasırnıñ matur ber bilgesenä oxşap tora. Axırda ber tözätü. Bula bit şundıy xikmätle xäl. Xätta “Azatlıq” radiosı, döresräge “Azatlıq” xäbärçeläre yalğışa ikän. Bu atnada Başqortostanda çığuçı “Yäşlek” gazetasında tatar milli problemalarğa bağışlanğan ber mäqälä turında fikerlär yañğırağan ide. Ämma anıñ avtorı tapşıruıbızda äytelgänçä, prezident administratsiäse wäkile Ämir Yuldaşbaev tügel, ä “Yäşlek” gazetasınıñ xäbärçese Azamat Yuldaşbaev. Ber familiäle ike şäxes ber-bersennän yäşläre belän dä, ğilmi däräcäläre belän dä ayırılıp tora. Barı tik Başqortostan tatar milli-mädäni xälen bäyälägändä genä, alar ber-bersenä oxşıy. Qısqası, Ämir äfände Yuldaşbaev aldında anıñ isemen döres häm urınlı qullanmağan öçen ğafu ütenäbez. “Yäşlek” gazetasındağı mäqäle Azamat yazğan. Dürt ayaqlı at ta abına, dilär. Milli mäs’älälärne tikşergändä abınırğa yazmasın, menä qayda xikmät. Rimzil Wäli
XS
SM
MD
LG