Accessibility links

Кайнар хәбәр

Bağdatta BMOnıñ başkvartirı urnaşqan bina aldında bomba şartladı, Ülüçelär häm yaralanuçılar bar.


Bügen BMOsınıñ Ğıraqtağı başkvartirı urnaşqan Bagadtağı Canal Qunaqyortı yanında maşinağa urnaştırılğan bombanıñ şartlauı näticäsendä hälak buluçılar häm yaralanuçılar bar. Yaralanuçılar arasında BMOnıñ Ğıraqtağı mäxsus väkile braziliäle Sergio Vieera de Mello häm BMOnıñ neftegä azıq-tölek programmasınıñ direktorı Benon Sevanda bar.

Audio

Sez BMOsı urnaşqan qunaqyortı aldında şartlağan bombanıñ tauışın işettegez. Ni öçen bu terror aktınıñ Ğıraqqa , anıñ xalqına yardäm itü öçen tırışqan oyışmağa qarşı yünälderelgän digän sorauğa ber nindi dä cavap birep bulmıy. Ägär dä höcüm andağı berektäş köçlärgä qarşı yünälderelgän bulsa ide, anı da aqlap bulmasa da, bälkim säbäben añlap bulır ide. Ğıraqqa yardäm itü öçen tırışqan törle agentlıqlarnıñ yüzärlägän xezmätkäre eşlägän binağa höcüm, BMOsı İminlek Şurası humanitar häm politik yardäm kürsätü öçen anda BMOnıñ 300 keşedän torğan mäxsus missiä cibärü turında qarar qabul itkännän soñ berniçä kün ütkäç yasaldı. Berençe xäbärlärgä qarağanda, 13 keşe hälak bulğan. Yaralanuçılar arasında BMOnıñ Ğıraqtağı mäxsus väkile Sergio Vieera de Mello da bar. Programmabız äzerlängändä, ul xarabälär astında ide häm anı qotqaru tırışlığı bara ide. BMOsı İminlek Şurası Nyu Yorjta aşığıç räveştä ciıldı häm höcümne xökem itkän belderü qabul itte. Siriäneñ BMOndağı ilçeseneñ urınbasarı Fayysal Mekdad İminlek Şurası isemennän yasağan çığışında höcümne xökem itte häm BMOnıñ andağı role dävam itäçäk dip belderde.

Audio

"İminlek Şurası ağzaları BMOnıñ Ğıraqtağı möhim roleneñ ähämiäten kimetüne maqsät itep quyğan şuşı höcüm alarnıñ qararlılığın yomışartmayaçaq häm İminlek Şurası ağzaları berdäm räveştä andıy häcümnärgä qarşı toraçaq häm tınıçlıq, stabillek urnaştıru öçen Ğıraq xalqına yardäm itäçäk digän pozitsiä aldılar."

Ğıraqtağı soñğı höcümnärneñ eçtälege üzgärde. Xärbilär genä tügel, ä başqalar da höcüm obyektı bulıp toralar. Yordan ilçelege yanında bomba şartlatu, Su häm nefte ütkärgeçlärenä şartlatu moña misal bulıp tora. Terrornı oyıştıruçılar monıñ belän Ğıraqta tınıçlıqnıñ urnaşuın häm vazşiätneñ stabilläşüen telämilär. Monıñ belän Berektäşlekne qıyın xäldä qaldırırğa tırışalar. Monıñ näticäsendä şäyepsez keşelärneñ hälak buluı häm soñğı çiktä ğıraq xalqınıñ cafa çigüe alarnı ber dä qızıqsındırmıy bulsa kiräk. Ğıraqta tärtip häm tınıçlıq urnaştıru qıyın bulaçaq häm anda törle illärneñ ğäskär cibärläre genä dä problemmanı xäl qıla almayaçaq kebek.

Färit İdelle, Praga.
XS
SM
MD
LG