20nçe avgustta Tatarstanda parlament saylawlarına start birelde - dip xäbär ittelär räsmi mäğlümat çaraları. Qazanda Tatarstan Üzäk saylaw komissiäse utırışı uzdı. Tikşerelgän mäs’älälärneñ berençese: Rusiä Däwlät Dumasına okrug saylaw komissiäläreneñ tözeleşen häm sanın bilgeläw. İkençese - Üzäk saylaw komissiäseneñ Kontrol'-reviziä xezmäte turında qağidälärne raslaw. Öçençe mäs'älä - “Tatarstan Däwlät Şurasına deputatlar saylawlar” turındağı qanunğa tözätmälärne tikşerü. Älege tözätmälär Däwlät Şurası qaramağına komissiä başlanğıçı belän kertelä. Çönki alar anıñ eşçänlegenä qağılışlı tözätmälär. Mäsälän anda saylawlarda qatnaşu däräcäse busağasın 35 protsent urınına 25 protsent quyu tözätmäse bar. Şulay itep çınnan da simvolik start birelde dip sanarğa bula. Xäyer, mäğlüm “Nu pogodi“ mul'tfil'mı personajı büre kebek üzenä-üze start birüçelär dä buldı inde. Respublika mäğlümat çaraları mäydanında kinät kenä - küktän töşkändäy päydä bulğan “Курьер” gazetasınıñ 20nçe avgustta inde öçençe sanı çıqtı. Bu qalın, tösle häm zinnätle gazetanıñ tışınnan uq zamança äytkändä dollarlar ise kilep tora. Ä ğämälgä quyuçıları tıynaq qına- agentstvo “İnform-klub ES” dielgän. Ğäyre räsmi çığanaqlarnıñ berse bu gazeta “Партия жизни”neke di, ikençese “Единая Россия”neke di. Döres gazeta qaysıdır ber partiä mänfäğätlären yaqlawın, bigräk tä agitatsiäläwen sizdermi. Läkin anıñ här sanında bulaçaq saylawlar teması berençe urında. Soñğı sanında ul “Qaysı partiälär Tatarstan xalqı öçen iñ aktual' problemalarnı bilgeli” digän ekspertiza näticälären kiterä. Gazeta cälep itkän ekspertlar bu mäs'älädä “СПС”qa häm “Яблоко”ğa östenlek birgännär. Läkin şul näticälär belän berrättän Vox populi soraşuı näticäläre kiterelä. Anda imeş berençe urında “Единая Россия”. Ğädättägeçä Duma saylawları finişına kem berençe kilep citäsen turıdan bärep “Звезда Поволжья” gazetası äytep birde. Anda administrativ resurs yärdäme belän “Единая Россия” neñ saylawçılarnıñ 70 protsentınıñ tawışın cıyuğa ireşü respublika öçen nindi fayda kiterer digän soraw quyıla. Räxmät äytüçe bulmas, tağın ber ayaqların sörtep ütärlär digän uyda “Zvezda Povolj'ya” gazetası. Rusiä Däwlät Dumasınıñ ğämäldäge deputatı Fändäs Safiullin İntertat.ru säxifäse forumında aldağı saylawlarnıñ tağın ber çeterekle sorawına cawap birde. “Rusiä Däwlät Dumasında tatar deputatlarınıñ kiläçäge barmı”- digän sorawğa cawapnı ul nıqlı ışanıç belän-“Nişläp bulmasın, bar”-dip başlıy. Näq simvolik start birelgän könne Fändäs Safiullin İntertat.ru säxifäsendä turıdan-turı elemtägä çıqtı. Milli mäs’älälärgä parlament saylawlarına qağılışlı sorawlarğa cawaplar birde. Deputat Tatarstan Däwlät Şurası kiläçäge turında inde küptän kuluarlarda pışıldaşqan ber fikerne qıçqırıp äytte. Anıñ äytüençä kiläçäktä Tatarstan parlamentına yöz deputat saylanırğa tieş. Deputatlar ike palatağa bülenep eşlärgä tieş dip sanıy Fändäs Safiullin.
Yunıs Ätnäle
