“Вечерняя Казань” gazetasınıñ 29nçı avgust sanında Marina Yudkeviçnıñ “Проект глас народа окупился полностью” digän mäqäläse basılğan. Anıñ fikerençä, tatar xalqına suverenitet kiräkmi, möstäqillekne türälär üz faydasına uylap çığarğan häm xäzer respublika, millät ruxı bötenläy cilgä oçqan. Läkin 30 avgustta Qazan milli-mädäni üzäge qarşında meñlägän tatar keşese 3-4 säğät buyı matur cırlar, millät turında şiğerlär tıñladı. Alar turında Marina Yudkeviç belmi häm bu xalıq ta Yudkeviçnı belmilär. Tatarlıq – tarlıq tügel ul. Tatarlıq häm irekkä omtılu – ul tabiği xis. 30 avgustta Qazanda bu xis härqayda sizelep tordı.
Xäyer, härqayda tügel. Xätta tatar moñnarı yañğırağan Qamal teatrı qarşında häm Märcäni mäçete tiräsendä dä tatarlarnıñ küp öleşe räxätlänep duñğız şaşlığın öçpoçmaqqa quyıp aşadı, araqığa sıra quşıp eçte. Respublikabıznıñ möstäqillege könendä çigeşle tübätäyle irlärneñ iserek kileş yörüläre bik säyer bulıp kürende, älbättä. Hiçyuğı tatarlar üzläre cıyılğan çaqta üzläre xälällek ürnägen kürsätsä, milli üseş şul bulır ide. Xäzergä Yudkeviç kebeklärgä dä eş bar äle.
Mäskäw mäğlümat çaraları bäyrämne niçek kürsätte soñ? Yäkşämbe kiçendä RTR telekanalınıñ maxsus reportajında çibär qızlar yarışı, top-model'lär turında tapşıru buldı. Anı alıp baruçı jurnalist matur gäwdäle häm söykemle qızlar Mäskäwgä kilep tönge restorannarnı bizäsälär dä bik faydalı, dide. Qayber oyışmalar üzläreneñ ofisların, mäcleslären bizär öçen maxsus kurslarda künegülär ütkän qızlarnı çaqıralar. Jurnalist fikerençä, bu bik äybät, çönki mäsälän, Qazanda yäşäwçe matur qız üz şähärendä qalsa, ul anda Qazan xuliganı belän yäşäp qıynalıp integäçäk. Ä Qazanda qalmıyça, Mäskäwdäge tönge klubnı bizäsä, caylıraq, di ul. Anda tormış maturraq, bay ir yäki söyärkä tabılırğa mömkin... 30-31 avgustta RTR kanalında Qazan turında menä şul xäbär genä işetelde. Rusiä üzäk mäğlümat çaraları Respublika könenä bernindi mäqälä yäki reportaj bağışlamadı. Xätta alar Rusiä prezidentı Vladimir Putinnıñ respublika köne belän qotlawın mäydanda iğlan itügä, zamança tözelgän Basket-xoll binası açıluğa da iğtibar itmäde. Tatarstannıñ qayber mäğlümat çaralarında da suverenitet – türälärneñ qoralı ğına ul digän fikerlär äytelde. Tatarstan Respublikası köne aldınnan iñ zur häm iñ mäkerle büläk “Татарский мир” gazetası baş möxärrire Boris Çurbanovtan kilde. Ul Rinat Aqçurin citäkçelegendäge “Watanım” xäräkäte ğämälgä quyğan “Татарский мир” digän gäzittä “Казанский котел” digän zur mäqälä bastırğan. Mäğnäse - Tatarstan möstäqillege tatar millätçeläre tarafınnan ğına uylap çığarılğan, millätçelek - ul Tatarstan türäläre qullana torğan ber qoral ğına. Ğomumän, Tatarstan häm tatar tele, tatar milläte dip yörüçelär bik yaman itep kürsätelä bu mäqälädä. Qısqası, Mäskäwdäge qayber zıyalılarnıñ şuşı gazeta tatarğa qarşı maxsus oyıştırılğan dip sanawçılar xaqlı bulıp çıqtı. Татарский мир gäziteneñ, Renat Aqçurin oyıştırğan “Watanım” oyışmasınıñ respublika bäyrämenä küçtänäçe açqıltımraq bulıp çıqtı. Diana İbrahimova
