2nçe sentäber - bäyrämnärdän soñ berençe eş köne. Ğädättä bu könne bäyrämneñ iñ küñelle çaraların iskä alalar häm iñ küñelsez xällärgä yomğaq yasıylar. Respublika köne belän Rusiä prezidentı Vladimir Putin qotlawı da bıyıl kötterep kenä kilde. Mäğlümat çaralarında qotlaw düşämbe kiçendä genä kürende. Soñ bulsa da uñ bulsın dip, bez dä tapşıruıbızda Rusiä prezidentı qotlawınnan ber özek kiteräbez: “Sezne Respublika köne belän qotlıym! Bu bäyräm küpmillätle Tatarstannıñ barlıq xalqın berläşterä. Anıñ tarixı turıdan-turı çın mäğnäsendä tigez xoquqlı federativ mönäsäbätlärgä yul açqan Rusiäneñ demokratik yañaruı belän bäyle. Bügenge köndä Tatarstan iqtisadi, sotsial', mädäni üseştäge qazanışları belän çın-çınlap ğorurlana ala. Älege uñışlar artında keşelärneñ eş söyüçänlege, eşlekle häm icadi initsiativaları tora. Häm älbättä barısınıñ nigezendä - respublikada saqlanuçı häm yuğarı bäyälänüçe etnikara häm konfessiäara tatulıq”. Bäyräm könnärendäge faciğäläre turında Eçke eşlär ministrlığı mäğlümatlar birä. Yäşel Üzändä Şähär könen bäyräm itkändä tuplı xokkey uyınınıñ Awropa çempionatında qatnaşqan 18 yäşlek sportsmen Pavel Skvorsov uramda qıynap üterelgän. Älmättä bäyräm tabınında dusları belän utırğanda ber ir şatlığı eçenä sıymağaç kesäsennän RGD-5 granatası çığarıp şartlatqan. Tabında utıruçı beräwneñ ayağın özdergän, qalğan dusların häm üz-üzen yaralağan. Uzğan yılğı bäyräm belän bäyle ber faciğä ber yıldan soñ tikşerelep mäxkämägä citkerelde. Mäğlüm ki, uzğan yıl Qazannan bäyräm çaralarınnan qaytıp citkäç, Ägerce rayonı başlığı Räfis Säyetov ğailäse küz aldında atıp üterelgän ide. Cinäyät eşen tikşerü 8 ay barğan. Tağın 4 ay waqıt gäyeplänüçelärneñ 31 tomlıq cinäyät eşe belän tanışuına kitkän. Mäğlüm ki, bu yallap üterüneñ zakazçığı häm başqaruçıları totqarlandı. Xäzer respublika tarixında iñ yañğırawışlı cinäyätne Tatarstannıñ Yuğarı mäxkämäse tikşerä. Qazannıñ xoquq saqlawçıların tağın ber cäncallı cinäyätne faş itü kötä. Monısı inde küptän tügel Mäskäwdä militsiäneñ üz arasında faş itelä başlağan Ubırlar eşe. Andıy ubırlar Qazan şähäreneñ Sovet rayonı militsiäsendä tabılğan.
Yunıs Ätnäle
