Fälästin premiäre Abbas wazıyfasına başlauına 100 kön tulı uñayınnan parlamentta yasağan çığışında tınıçlıq planınıñ körçekkä terälüenä säbäp bulğan krizis öçen İzrael yağı ğäyeple , şulay da plannı canlandıru tırışlıqları däwam itäçäk dip belderde.Abbas süzlärençä (audio) İzraelneñ Nablus vä Hebrondağı üterüläre atışlarnı tuqtatu kileşüeneñ köçtän çığuına säbäp buldı. Premier İzrael vä fälästinnär arasında däwam itkän köç qullanu aksiäläre häm kürsätelgän reaksiälär sıqlı tuqtatılırğa tieş dide. Ul''yul haritası'' dip yäretelgän tınıçlıq planın äzerlägän kuartet yäğni AQŞ, Yevropa Berlege , Russiä häm BMOnı plannı qotqaru ,canlandıru öçen qatıraq eşlärgä çaqırdı. Yasir Arafat belän alıp barğan xakimiät köräşe säbäple aftoritetı şaqtıy kimegän Abbas ,parlamentqa yä mine yaqlıysız yä dä öygä qaytarıp cibäräsez, min bu çiksez qıyın postnı saqlap qalu öçen köräşmiäçäkmem dip äytte. Premier AQŞ tarafınnan yaqlanğan planda progress buluı öçen mina tulı aftoritet birelergä tieş dip söyläsä dä, ul ışanıç tawışı turında süz quzğatmadı.İzrael Amerika tarafınnan yaqlanğan Abbasqa ,fälästinnär ällä ni simpatiä belän qaramıy.Anıñ ışanıçsızlıq tawışı aluı, 3 yıldan birle däwam itkän intifadanı tuqtatu häm fälästin däwlätçelege öçen alıp barılğan tırışlıqlarğa zur orım bulır ide. Çığışında ul Arafat belän üze arasındağı konfliktqa , xökümät belän fälästin citäkçelege arasında qayber problemalar bar dip kenä äytte. Abbas Arafatnıñ iminlek köçläre östennnän urnaştırğan kontrolne üzenä tapşırıluın sorıy Älege waqıtta här citäkçe 4 qorallı xezmätne kontrol itä.Arafat xakimiäteneñ sonğı tayanıçın tapşırırğa ber dä aşıqmıy. AQŞ belän İzrael fälästinnärdän qorallı törkemnärne taratuların sorıy , bu tınıçlıq planında da taläp itelä. Ämma Abbas andıy qurqınıçlı eşkä kereşä almıy, monıñ watandaşlar suğışına alıp baraçağın bik yaxşı belä. Bugen ul parlamentta bu xökümät opozitsiä törkemnäre belän problemanı politsiä tügel ä dialog aşa xäl qılaçaq dip äytte. M.Abbas 18 säxifälek çığışında, premierlek wazıyfasına başlağannan soñ ütkän100 kön eçendä ireşkän iñ zur uñış dip, qorallı törkemnärneñ 29nçe iyündä iğlan itkän ber yaqlı atışlarnı tuqtatu kileşüen telgä aldı.Ul İzraelneñ qulğa alu ,üterüläre kileşüneñ bozıluına kiterde dip anı ğäyepläp çıqtı. Ul şulayuq İzrael provakatsiälären tuqtatu öçen AQŞ citärlek eşçänlek alıp barmadı dip tä äytte. Ul politik kiläçägemne parlament qulına tapşıram , min bu posqa yäbeşep yatmim , bu bik qıyın missiä, xätta qayberäülär başqaru mömkin dä tügel dip qarıy disä dä premier, yä xakimiät resursların tapşırıp mine yaqlağız, yä mandatnı kire alığız dip süzlären tämamladı. Parlamentnıñ yaqlauın alu älbättä Abbasqa Arafat belän konfrontatsiädä yardäm itär ide. Ciñelü tınıçlıq planınıñ yuqqa çığuı kebek näticälär öçen ğäyeplänmi postınnan çigenüenä mömkinlek birer ide. Parlamentnıñ mäxsus sessiäse başlanğanda Fatax xäräkäteneñ 200çaması aktivistı Arafatnı yaqlap, demonstratsiä ütkärde, bitleklär kigän ber niçä keşe parlament binası täräzälären wattı. İzrael ägär dä M.Abbas urınınnan çitlätelsä, Arafat bilgeläp quyğan xökümät belän eş itmiäçäkbez dip aldan belderep quydı. Töbäktäge AQŞ diplomatları Abbas urınınnan kitsä Waşington yaqın könçığışta bälkim dä aradaşçı rolen kimeter dip äytä. Fälästin parlamentı kiläse atnada yañadan cıyılıp Abbas turında qarar biräçäk dip kötelä.
färidä xämit, praga
färidä xämit, praga