Accessibility links

Кайнар хәбәр

Alsu neft’çelärne Iq yarında qotlayaçaq...


Tatarstanda yänä bäyrämnärgä äzerlänälär. Respublikanıñ qara altın çığara torğan töbäklärendä yallarda Neft’çelär könen bilgeläp ütärgä cıyınalar. Citmäsä, bıyıl bu bäyrämgä äle berniçä yubiley da quşıla. Berençedän, bıyıl respublikanıñ iñ öre şirkätläreneñ berse – Tatneft’ üzeneñ 60 yıllıq yubileyın bilgeli. İkençedän, Älmät şähäre dä üzeneñ tuğan könen – 50 yıllığın bäyräm itäçäk. Şuña da tantanalar bik zur häm qupşı bulaçaq. Aldağı 2-3 köngä Tatarstanda töp tormış respublikanıñ könçığışına küçä disäñ dä bula. 5-7nçe sintäberdä iñ möhim waqiğalar, iñ qızıqlı çaralar näq menä monda ütäçäk. Älmättä bu könnärdä qunaqlar da küp bula. Alar arasında respublikanıñ barlıq diärlek tä citäkçeläre genä tügel. Bäyrämnärgä Mäskäwdän dä bik däräcäle qunaqlar kiler dip kötelä. Şunısın da äytergä kiräk, Tatarstan iqtisatınıñ nigeze bulğan neft’ tarmağınıñ bäyrämenä, bıyılğı olı yubileylarğa bik nıqlap äzerländelär. Tantanalı çaralar inde comğa könne ük Bögelmä şähärendä başlanıp kitte. 5 sentäberdä anda Tatneftegeofizika şirkäte oyışuınıñ 50 yıllığı häm şähärneñ Boz sarayı açılu uñayınnan bäyräm çaraları ütte. 6 sentäberdä bäyrämnär estafetasın Älmät şähäre alaçaq. Programmada - törledän-törle konsertlar, tamaşalar, sort häm mädäni çaralar, balalar bäyrämnäre, tatar häm rus estradası yoldızları çığışları. Tatarstan neft’çeläre bäyrämenä xätta cırçı Alsu da kilergä tieş ikän. İnde işetkänegezçä, Başqortstannıñ Oktyabrski şähärendä Alsunıñ konsertı tıyılğaç, ul üzeneñ çığışın Iq yılğasınıñ Tatarstan yarında ütkärergä bulğan. Qazan waqıtın belän kiçke säğät 6da bar telägän keşe, buşlay tabiğät qoçağında Alsu başqaruında tatar, rus, ingliz tellärendä cırlar tıñlıy alaçaq. Yañğır häm salqın hawa torışına da qaramastan cırçınıñ konsertın qararğa xätta Qazannan barırğa da cıyınalar ikän. Şunısın da äytergä kiräk, soñğı arada Alsu Tatarstanda şaqtıy yış çığış yasıy başladı. 31nçe avgust könne ul Çallıda, şähär könendä qatnaşıp, konsert birgän ide. Distälägän meñ keşene cıyğan cırçınıñ bu konsertın ul yulı Rusiä Duması deputatı Oleg Morozov oyıştırğan ide. Şulay itep, saylawlar yaqınlaşqan sayın, xalıqnıñ tormışı törle konsertlar, yoldızlar belän oçraşularğa baya bara.
XS
SM
MD
LG