Accessibility links

Fälistinlelär Tatarstannan ürnäk ala...


Respublikada dekaber’ ayında ütäçäk saylawlarğa äzerlek däwam itä. Xäyer, xäzergä äle säyäsi firqälär ällä ni zur aktivlıq kürsätmi. Anıñ qarawı, Tatarstannıñ Üzäk saylaw komissiäse tik utırmıy. Mäsälän, sişämbe könne Anatoliy Fomin citäkçelegendä älege oyışmanıñ utırışı uzdı. Anda 5 okrug saylaw komissiäse tözelde, alarnıñ räisläre saylandı. Tizdän bu citäkçelär saylawlarnı ütkärergä öyräner öçen Mäskäwgä uquğa kitäçäk. Xäyer, bezneñ üzebezneñ dä bu ölkädä öyräterlek närsä bar. Rusiä prezidentı Vladimir Putin da Tatarstannı saylawlar ğadel häm namuslı ütä torğan töbäk dip sanıy ikän. Çönki Rusiägä saylawlar oyıştıru täcribäsen öyränergä kilgän Fälestin milli xakimiäte wäkilçelege näq menä Putin kiñäşe buyınça çärşämbe könne Qazanğa kilep töşte. Delegatsiä Fälistinneñ saylaw komissiäläre äğzalarınnan tora, anı Üzäk komissiä başlığı Xana Näser citäkli. Qazanda alar üzläreneñ kollegaları belän oçraşıp söyläşäçäk, täcribä cıyaçaq. Şulay uq fälistinlelär Tatarstannıñ Däwlät Şurası wäkilläre, Prezident apparatı xezmätkärläre belän dä oçraşaçaq.

Vladimir Putin Tatarstannı bu arada saylawlar belän bäyle räweştä genä iskä almadı. Nik disäñ, 10nçı sintäber könne prezident Rusiä xökümäteneñ vitse-premyerı, finans ministrı Aleksey Kudrin belän oçraşıp, Qazannıñ meñyıllığına äzerlek programmasın da tikşergän, dip xäbär itä İntertat.ru agentlığı. Kudrin süzlärenä qarağanda, eş ike yünäleş buyınça bara. Berençese – respublikanıñ sotsial’-iqtisadi üseşe, ä ikençese – Qazannıñ yubileyına äzerlek. Şunısın da äytergä kiräk, Bäyrämgä äzerlek programmasın finanslaw ike märtäbägä arttırılıp 2 milliard sumnı täşkil itärgä tieş. Bu bik äybät älbättä, läkin Mäskäw aqçaları bik yıraq häm alar äle qayçan kilep citäçäk. Ä eşlärne inde xäzer ük tizlätergä kiräk. Çönki bäyrämgä qädär waqıt bik az qalıp bara, ä eşlise eşlär äle bixisap. Comğa, 12nçe sintäberdä vitse-premyer Aleksey Kudrin citäkçelegendä Qazanda ütäçäk başqalabıznıñ meñyıllığına äzerlek komissiäseneñ utırışında süz şuşı xaqta da barır, möğayın. Ä Vladimir Putinnı isä, älege utırışnıñ näticäläre belän vitse-premyer Qazannan qaytqaç tanıştıraçaq.

XS
SM
MD
LG