Tatarstannıñ elemtä şirkätläre Mäskäwdä uza torğan İnfokom-2003 kürgäzmäsendä qatnaşalar. Respublikada şaqtıy zur üseş alğan elemtä tarmağında eş itüçe oyışmalar älege xalıqara cıyında çit il firmaları belän mönäsäbätlär urnaştırırğa niätli. Lukoyl aksionerlıq cämğiäte citäkçelege Tatarstandağı üzläreneñ yağulıq stansiälären yabu teläge turında belderde. Bu xaqta Tatar-inform agentlığına şirkätneñ vitse-prezidentı Rawil Maganov xäbär itte. Lukoyl citäkçelege üzeneñ bu ğämälen bolay añlatqan. Respublikada şirkätneñ 10-12 yağulıq stansiäse genä bar, Tatarstanda isä bu ölkädä Tatneft’ şirkäte östenlek itä. Şuña kürä, alarnı Tatneft’neñ başqa töbäklärdäge benzin stansiälärenä almaştıru döresräk bula. Rawil Maganov, şulay uq, Lukoyl belän Tatneft’ arasındağı mönäsäbätlärgä dä tuqtalıp, alar bik äybät, dip beldergän. Bez ber-berebezneñ eşçänlegenä qomaçawlamıybız, üzara xezmättäşlek itäbez. Bezneñ citäkçelär dä partnerlar ğına tügel, ä duslar, dip beldergän. Şulay itep, Lukoylnıñ respublikadağı yağulıq stansiäläre yabılu, älege şirkätneñ Tatarstanda eşçänlege tuqtatılunı añlatmıy.
Gölnaz İlgizär
